తెలంగాణ ప్రభుత్వ పాఠశాలల్లో టీచర్ల కొరత

తెలంగాణలో 2026-27 విద్యా సంవత్సరం ప్రారంభమైనప్పటికీ ప్రభుత్వ, స్థానిక సంస్థల పాఠశాలల్లో ఉపాధ్యాయుల కొరత సమస్య కొనసాగుతోంది. పెద్ద సంఖ్యలో ఉపాధ్యాయులు పదవీ విరమణ చేయడంతో పలు పాఠశాలల్లో ఖాళీలు ఏర్పడ్డాయి. జూన్ 20 నాటికి విద్యార్థుల నమోదు వివరాల ఆధారంగా అదనపు ఉపాధ్యాయులను గుర్తించి అవసరమైన పాఠశాలలకు తిరిగి నియమించాలని పాఠశాల విద్యాశాఖ జిల్లా విద్యాధికారులకు ఆదేశాలు జారీ చేసింది.

అయితే కేవలం ఉపాధ్యాయుల బదిలీలు, తిరిగి నియామకాలతో సమస్య పూర్తిగా పరిష్కారం కాదని ఉపాధ్యాయులు అభిప్రాయపడుతున్నారు. ముఖ్యంగా ఉన్నత పాఠశాలల్లో గణితం, భౌతిక శాస్త్రం, జీవశాస్త్రం వంటి కీలక సబ్జెక్టులకు ప్రత్యేక ఉపాధ్యాయుల కొరత తీవ్రంగా ఉందని చెబుతున్నారు. కొన్ని ప్రభుత్వ ఉన్నత పాఠశాలలు ఆయా సబ్జెక్టులకు టీచర్లు లేకుండానే కొత్త విద్యా సంవత్సరాన్ని ప్రారంభించినట్లు సమాచారం.