సమాజ అభివృద్ధిలో ఉపాధ్యాయులు భాగస్వాములు కావాలి t – ఉప ముఖ్యమంత్రి భట్టి విక్రమార్క

ఉపాధ్యాయులు కేవలం తరగతి గదుల్లో పాఠాలు బోధించడానికే పరిమితం కాకుండా విద్యార్థుల కుటుంబ, సామాజిక పరిస్థితులను అర్థం చేసుకుని సమాజ అభివృద్ధిలో భాగస్వాములు కావాలని ఉప ముఖ్యమంత్రి భట్టి విక్రమార్క పిలుపునిచ్చారు. విద్య ద్వారానే సామాజిక పరివర్తన సాధ్యమని, తెలంగాణ యువతను ప్రపంచంతో పోటీపడే స్థాయికి తీర్చిదిద్దడమే ప్రజా ప్రభుత్వ లక్ష్యమని స్పష్టం చేశారు. ఆదివారం ఖైరతాబాద్‌లోని ఇంజినీరింగ్ అసోసియేషన్ భవనంలో నిర్వహించిన స్కూల్ టీచర్స్ ఫెడరేషన్ (ఎస్‌టీఎఫ్) రాష్ట్ర విద్యా మహాసభలను ఆయన జ్యోతి ప్రజ్వలన చేసి ప్రారంభించారు. ఈ సందర్భంగా మాట్లాడుతూ విద్యార్థుల భవిష్యత్తును తీర్చిదిద్దడంలో ఉపాధ్యాయుల పాత్ర కీలకమని పేర్కొన్నారు. విద్యార్థుల ఎదుగుదలపై పాఠశాల బోధనతో పాటు ఇంటి వాతావరణం, పౌష్టికాహారం, కుటుంబ ఆర్థిక పరిస్థితులు, సామాజిక నేపథ్యం కూడా ప్రభావం చూపుతాయని వివరించారు. ప్రభుత్వం అందిస్తున్న సంక్షేమ పథకాలపై విద్యార్థుల తల్లిదండ్రులకు ఉపాధ్యాయులు అవగాహన కల్పించాలని సూచించారు.

ఉపాధ్యాయుల దీర్ఘకాలిక సమస్యల పరిష్కారానికి ప్రజా ప్రభుత్వం ప్రాధాన్యత ఇస్తోందని భట్టి తెలిపారు. వేలాది మంది ఉపాధ్యాయులకు పదోన్నతులు కల్పించామని, సుమారు 11 వేల ఉపాధ్యాయ పోస్టులను భర్తీ చేయడంతో పాటు 30 వేల నుంచి 35 వేల మందికి బదిలీలు చేపట్టామని వివరించారు. ప్రభుత్వ విద్యారంగాన్ని అంతర్జాతీయ ప్రమాణాలతో అభివృద్ధి చేసేందుకు యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు, తెలంగాణ పబ్లిక్ స్కూళ్లను ఏర్పాటు చేస్తున్నట్లు చెప్పారు. రాష్ట్రవ్యాప్తంగా 105 యంగ్ ఇండియా పాఠశాలలకు అనుమతులు మంజూరు చేశామని, ప్రతి శాసనసభ నియోజకవర్గంలో కనీసం ఒక పాఠశాలను ఏర్పాటు చేయాలన్నది ప్రభుత్వ లక్ష్యమని వెల్లడించారు. ఒక్కో పాఠశాలను 20 నుంచి 25 ఎకరాల్లో సుమారు రూ.200 కోట్ల వ్యయంతో నిర్మిస్తున్నట్లు తెలిపారు. విద్యతో పాటు వసతి, క్రీడలు, ఇతర సహపాఠ్య కార్యక్రమాలకు అవసరమైన సదుపాయాలు కల్పిస్తున్నామని చెప్పారు. అన్ని సామాజిక వర్గాల పిల్లలు ఒకే ప్రాంగణంలో చదువుకునేలా ఈ పాఠశాలలను రూపొందిస్తున్నామని పేర్కొన్నారు. అలాగే దాదాపు 100 తెలంగాణ పబ్లిక్ స్కూళ్లను సెమీ రెసిడెన్షియల్ విధానంలో ఏర్పాటు చేయాలని నిర్ణయించినట్లు తెలిపారు. విద్యార్థులకు రవాణా, యూనిఫాం, బూట్లు, టై, పుస్తకాలు, బ్యాగులు, అల్పాహారం, మధ్యాహ్న భోజనం అందించి, సాయంత్రం ఇంటికి పంపిస్తామని వివరించారు. రాష్ట్రవ్యాప్తంగా సుమారు 27 లక్షల మంది విద్యార్థులకు అల్పాహారం అందిస్తున్నామని, రెసిడెన్షియల్ పాఠశాలల్లో డైట్ ఛార్జీలను 40 శాతం, కాస్మెటిక్ ఛార్జీలను 200 శాతం పెంచామని తెలిపారు.

విద్యార్థుల కుటుంబాలకు కూడా ప్రభుత్వం సంక్షేమ పథకాల ద్వారా అండగా నిలుస్తోందని భట్టి పేర్కొన్నారు. ఇందిరమ్మ ఇళ్ల పథకం కింద అర్హులైన పేద కుటుంబాలకు ఒక్కో ఇంటికి రూ.5 లక్షల ఆర్థిక సాయం అందిస్తున్నామని, ఇప్పటివరకు 8 లక్షల ఇళ్లకు అనుమతులు మంజూరు చేశామని తెలిపారు. 200 యూనిట్ల ఉచిత విద్యుత్, సన్నబియ్యం పంపిణీ, వృద్ధులకు పెన్షన్లు వంటి పథకాల గురించి ఉపాధ్యాయులు తల్లిదండ్రులకు వివరించాలని కోరారు. ప్రభుత్వ ఉద్యోగులు, ఉపాధ్యాయులకు ప్రతి నెలా ఒకటో తేదీనే జీతాలు చెల్లిస్తున్నామని చెప్పారు. ఉద్యోగుల కోసం క్యాష్‌లెస్ హెల్త్ కార్డు సదుపాయాన్ని అమల్లోకి తీసుకొచ్చామని, పెండింగ్ బిల్లులను దశలవారీగా చెల్లిస్తూ నెలకు రూ.750 కోట్ల నుంచి రూ.1,000 కోట్ల వరకు విడుదల చేస్తున్నామని వివరించారు. సోక్రటీస్, ప్లేటో, అరిస్టాటిల్ వంటి తత్వవేత్తలను ప్రస్తావిస్తూ ఉపాధ్యాయులు కూడా భవిష్యత్ తరాలు గర్వించేలా సేవలందించాలని పిలుపునిచ్చారు. ఉపాధ్యాయులు సామాజిక పరివర్తనకు మార్గదర్శకులుగా ఎదగాలని ఆకాంక్షించారు. వారు ప్రస్తావించే సమస్యలను సానుకూలంగా పరిశీలించేందుకు ప్రభుత్వం సిద్ధంగా ఉందని భరోసా ఇచ్చారు. ఈ కార్యక్రమంలో మాజీ ఎమ్మెల్యే కిచ్చన్న లక్ష్మారెడ్డి, ఎస్‌టీఎఫ్ రాష్ట్ర అధ్యక్షుడు దేవరకొండ సైదులు, ప్రధాన కార్యదర్శి పోచయ్య, ప్రొఫెసర్ విశ్వేశ్వర్‌రావు తదితరులు పాల్గొన్నారు.