పల్నాడు జిల్లాలోని జొన్నలగడ్డ గ్రామంలో సర్పంచ్ పదవికి భారీ వేలం

ఆంధ్రప్రదేశ్‌లో గ్రామ పంచాయతీ ఎన్నికల సందడి నామినేషన్ల ప్రక్రియ ప్రారంభం కాకముందే మొదలైంది. ఎన్నికల ఖర్చులు, స్థానిక వర్గ విభేదాలను నివారించేందుకు కొన్ని గ్రామాల్లో ఏకగ్రీవ ఎన్నికలపై ఆసక్తి చూపుతుండగా, మరికొన్ని చోట్ల సర్పంచ్ పదవుల కోసం వేలంపాటలు నిర్వహిస్తున్నట్లు వార్తలు వస్తున్నాయి. పల్నాడు జిల్లా నరసరావుపేట మండలంలోని జొన్నలగడ్డ గ్రామ పంచాయతీలో సర్పంచ్ పదవికి రూ.81 లక్షల బిడ్ రావడం చర్చనీయాంశంగా మారింది. ఐదు వేల లోపు జనాభా ఉన్న ఈ పంచాయతీకి తొలి విడతలో ఎన్నికలు జరగనున్నాయి. గ్రామంలో ఎన్నికలు నిర్వహించకుండా ఏకగ్రీవంగా సర్పంచ్‌ను ఎంపిక చేయాలని రెండు ప్రధాన పార్టీలకు చెందిన స్థానిక నాయకులు నిర్ణయించినట్లు సమాచారం. అయితే, సర్పంచ్ పదవికి ముగ్గురు అభ్యర్థులు ఆసక్తి చూపడంతో ఎవరిని ఎంపిక చేయాలనే అంశంపై గ్రామ పెద్దలు చర్చలు జరిపారు.

చివరకు అభ్యర్థిని ఖరారు చేసేందుకు వేలంపాట నిర్వహించాలని నిర్ణయించారు. రెండు రోజుల క్రితం గ్రామ పెద్దల సమక్షంలో జరిగిన ఈ వేలంలో కొరటా గోపాలరావు రూ.77 లక్షలు చెల్లించేందుకు ముందుకు రాగా, యర్రా శ్రీనివాసరావు రూ.81 లక్షల బిడ్ వేశారు. దీంతో శ్రీనివాసరావును ఏకగ్రీవ అభ్యర్థిగా నిలబెట్టాలని గ్రామ పెద్దలు నిర్ణయించినట్లు సమాచారం. అనంతరం గ్రామంలో ఆయన పేరుతో ఫ్లెక్సీలు కూడా ఏర్పాటు చేశారు. ఇదిలా ఉండగా, ఏకగ్రీవంగా ఎన్నికయ్యే గ్రామ పంచాయతీలకు రాష్ట్ర ప్రభుత్వం ప్రోత్సాహక నిధులు ప్రకటించింది. ఐదు వేల లోపు జనాభా ఉన్న పంచాయతీలకు రూ.15 లక్షలు, ఐదు వేల నుంచి పది వేల లోపు జనాభా ఉన్న పంచాయతీలకు రూ.25 లక్షలు, పది వేలకు పైగా జనాభా ఉన్న పంచాయతీలకు రూ.50 లక్షలు అందించనున్నట్లు తెలిపింది. జొన్నలగడ్డ పంచాయతీ ఎన్నిక అధికారికంగా ఏకగ్రీవమైనట్లు ప్రకటిస్తే, రూ.81 లక్షల బిడ్‌కు అదనంగా ప్రభుత్వ ప్రోత్సాహకంగా రూ.15 లక్షలు వచ్చే అవకాశం ఉంది. ఎన్నికైన పదవుల కోసం వేలంపాటలు నిర్వహించే విధానంపై, ఏకగ్రీవ ఎన్నికలను ప్రోత్సహించేందుకు ప్రభుత్వం ప్రకటించిన నిధుల ప్రభావంపై ఈ పరిణామం చర్చకు దారితీసింది.