యూపీఐ లావాదేవీల్లో సరికొత్త రికార్డు.. రోజుకు రూ.లక్ష కోట్లకు పైగా చెల్లింపులు!

దేశంలో డిజిటల్ చెల్లింపుల వినియోగం వేగంగా పెరుగుతోంది. ఈ క్రమంలో అక్టోబర్ నెలలో యూనిఫైడ్ పేమెంట్స్ ఇంటర్‌ఫేస్ (యూపీఐ) సరికొత్త రికార్డును నమోదు చేసింది. నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పీసీఐ) గణాంకాల ప్రకారం, యూపీఐ ద్వారా రోజువారీ లావాదేవీల సగటు విలువ తొలిసారిగా రూ.లక్ష కోట్లను దాటింది. అక్టోబర్‌లో మొత్తం రూ.31.53 లక్షల కోట్ల విలువైన చెల్లింపులు జరిగాయి. దసరా, దీపావళి పండుగల సందర్భంగా షాపింగ్, ఆన్‌లైన్ కొనుగోళ్లు పెరగడం ఈ వృద్ధికి ప్రధాన కారణాలుగా నిలిచాయి.

లావాదేవీల సంఖ్యలోనూ అక్టోబర్ కొత్త రికార్డు సృష్టించింది. ఈ నెలలో మొత్తం 25.47 బిలియన్ లావాదేవీలు నమోదయ్యాయి. అంటే రోజుకు సగటున 82.1 కోట్ల లావాదేవీలు జరిగాయి. సెప్టెంబర్‌లో నమోదైన రోజువారీ సగటు 80.2 కోట్లతో పోలిస్తే ఇది ఎక్కువ. ఇదిలా ఉండగా, కొన్ని ఎంపిక చేసిన యూపీఐ చెల్లింపులపై మర్చంట్ డిస్కౌంట్ రేట్ (ఎండీఆర్) ఛార్జీలు అమలు చేసే అంశం చర్చలో ఉంది. పండుగల సమయంలో ఈ ఛార్జీలు వినియోగదారులు, వ్యాపారాలపై ప్రభావం చూపవచ్చని వ్యాపార సంఘాలు, ఫిన్‌టెక్ సంస్థలు అభిప్రాయపడటంతో నిర్ణయం వాయిదా పడింది. దీపావళి తర్వాత ఈ ఛార్జీల అమలుపై స్పష్టత వచ్చే అవకాశం ఉందని కథనం పేర్కొంది.