తిరుమల దర్శనం తర్వాత కొత్త పార్టీపై విజయసాయిరెడ్డి కీలక అడుగు

మాజీ ఎంపీ విజయసాయిరెడ్డి తన ఆప్తమిత్రుడు రమణతో కలిసి తిరుమల శ్రీవేంకటేశ్వర స్వామివారిని దర్శించుకున్నారు. నూతన రాజకీయ పార్టీ ఏర్పాటు సంకల్పంతో ముందుకు సాగుతున్న నేపథ్యంలో, తన రాజకీయ ప్రయాణంలో కలిసి రావాలని రమణను ఆహ్వానించినట్లు తెలిపారు. ఇద్దరం కలిసి పనిచేసి విజయం సాధిస్తామని ఆయన విశ్వాసం వ్యక్తం చేశారు. ఆంధ్రప్రదేశ్ అభివృద్ధి, ప్రజల సంక్షేమమే తమ ప్రధాన లక్ష్యాలని పేర్కొన్నారు.

2004–2006 కాలం నుంచి రమణతో తనకు అనుబంధం ఉందని, ఈ స్నేహం చిరకాలం కొనసాగాలని కోరుకుంటున్నట్లు విజయసాయిరెడ్డి తెలిపారు. గతంలో నాలుగేళ్ల పాటు టీటీడీ బోర్డు సభ్యులుగా భావసారూప్యతతో కలిసి పనిచేసిన విషయాన్ని గుర్తుచేశారు. జీయర్ స్వామి, ఇతర పీఠాధిపతుల అభీష్టం మేరకు తిరుమలలో వెయ్యి కాళ్ల మండపం పునర్నిర్మాణానికి కృషి చేస్తామని చెప్పారు. శ్రీవారి ఆలయ పవిత్రతను కాపాడటమే తమ మొదటి కర్తవ్యమని స్పష్టం చేశారు.