అమెరికాలో జిన్‌పింగ్‌కు అరుదైన స్వాగతం..

చైనా అధ్యక్షుడు జిన్‌పింగ్‌ మూడు రోజుల అమెరికా పర్యటనలో భాగంగా బుధవారం వాషింగ్టన్‌ చేరుకున్నారు. ఆయనకు జాయింట్‌ బేస్‌ ఆండ్రూస్‌లో అరుదైన రీతిలో ఘన స్వాగతం లభించింది. అమెరికా అధ్యక్షుడు డొనాల్డ్‌ ట్రంప్‌, ప్రథమ మహిళ మెలానియా ట్రంప్‌ స్వయంగా విమానాశ్రయానికి చేరుకుని జిన్‌పింగ్‌, ఆయన సతీమణి పెంగ్‌ లియువాన్‌కు స్వాగతం పలికారు. 100 అడుగుల రెడ్‌ కార్పెట్‌, 21 మంది సభ్యులతో కూడిన గౌరవ వందనం, మిలిటరీ బ్యాండ్‌ సంగీతం, అధికారిక లాంఛనాలతో కార్యక్రమం నిర్వహించారు.

స్వాగత కార్యక్రమం జరుగుతున్న సమయంలో అమెరికా వైమానిక దళానికి చెందిన రెండు బి-1 బాంబర్లు గగనతలంలో విన్యాసం చేశాయి. అమెరికా, చైనా జాతీయ గీతాలు కూడా వినిపించాయి. దశాబ్దానికి పైగా తర్వాత జిన్‌పింగ్‌ వాషింగ్టన్‌లో పర్యటించడం ఇదే తొలిసారి. ఈ పర్యటనలో ట్రంప్‌, జిన్‌పింగ్‌ ద్వైపాక్షిక సంబంధాలతో పాటు పలు అంతర్జాతీయ అంశాలపై చర్చించనున్నారు. విదేశీ నేతలకు సాధారణంగా వైట్‌హౌస్‌లో స్వాగతం పలికే ఆనవాయితీకి భిన్నంగా ట్రంప్‌ స్వయంగా విమానాశ్రయానికి వెళ్లడం ఈ కార్యక్రమంలో ప్రత్యేకతగా నిలిచింది.