ఇరాన్ రహస్య మార్గాలపై నిఘాకు అమెరికా ప్రత్యేక టాస్క్‌ఫోర్స్ ఏర్పాటు

అమెరికా, ఇరాన్ మధ్య ఉద్రిక్తతలు కొనసాగుతున్న వేళ టెహ్రాన్‌కు సంబంధించి అమెరికా సెంట్రల్ కమాండ్ కీలక ఆరోపణలు చేసింది. ఆయుధాలు, ఇతర అక్రమ సామగ్రిని సరిహద్దు దేశాల నుంచి ఇరాన్‌లోకి తరలించేందుకు ఆ దేశ నాయకులు రహస్య భూగర్భ, భూమార్గాలను వినియోగిస్తున్నారని పేర్కొంది. ఈ మార్గాలను గుర్తించి, వాటి కార్యకలాపాలపై నిఘా పెట్టేందుకు ప్రత్యేకంగా 20 మంది సభ్యులతో కూడిన టాస్క్‌ఫోర్స్‌ను ఏర్పాటు చేసే దిశగా సైనికాధికారులు చర్యలు చేపట్టినట్లు వెల్లడించింది.

హర్మూజ్ జలసంధి సహా ఇరాన్ చుట్టుపక్కల ఉన్న ఓడరేవులు, అంతర్జాతీయ జలమార్గాలపై అమెరికా ఆంక్షలు అమలు చేస్తున్న నేపథ్యంలో, వాటిని తప్పించుకునేందుకు ఇరాన్ ప్రత్యామ్నాయ రవాణా మార్గాలను ఉపయోగిస్తోందని అమెరికా ఆరోపిస్తోంది. ఉగ్రవాద సంస్థలకు నిధులు సమకూర్చడం, ఆయుధ తయారీ కేంద్రాలను పునర్నిర్మించడం, సైనిక సామర్థ్యాన్ని పెంచుకోవడం వంటి ఇరాన్ ప్రయత్నాలను అడ్డుకోవడం ఈ టాస్క్‌ఫోర్స్ ప్రధాన లక్ష్యాలుగా ఉండనున్నాయి. ఫ్లోరిడా కేంద్రంగా పనిచేయనున్న ఈ విభాగంలో సైనికులతో పాటు పౌరులకు కూడా అవకాశం కల్పించనున్నట్లు సమాచారం.