త్వరలో ధనుష్‌ రాజకీయ ప్రకటన? అభిమానుల్లో పెరిగిన ఆసక్తి

తమిళనాట మరో ప్రముఖ నటుడు త్వరలో రాజకీయాల్లోకి అడుగుపెట్టబోతున్నారనే ఊహాగానాలు జోరందుకున్నాయి. నటుడు ధనుష్‌ కొంతకాలంగా పలు సేవా కార్యక్రమాలు నిర్వహిస్తూ అభిమానులతో మమేకమవుతున్నారు. తాజాగా ఆయన ‘తమిళగ ఎళుచ్చి కళగం’ (తమిళ చైతన్యం) పేరుతో పార్టీని ఎన్నికల కమిషన్‌ వద్ద రిజిస్ట్రేషన్‌ కోసం పంపించినట్లు తమిళనాట చర్చ జరుగుతోంది. ఈ వార్తలతో ధనుష్‌ అభిమానుల్లో రాజకీయ ప్రవేశంపై ఆసక్తి మరింత పెరిగింది.

ఇటీవల ధనుష్‌ నిర్వహిస్తున్న కార్యక్రమాలు, అభిమానులను ఉద్దేశించి చేస్తున్న ప్రసంగాలు, సేవా కార్యక్రమాలు ఆయన రాజకీయ అరంగేట్రంపై వస్తున్న ఊహాగానాలకు మరింత బలం చేకూరుస్తున్నాయి. ప్రస్తుతం తమిళనాట జరుగుతున్న ఉప ఎన్నికల ఫలితాల అనంతరం ఆయన రాజకీయ కార్యాచరణ వేగం పుంజుకునే అవకాశం ఉందని అభిమాన సంఘాలు పేర్కొంటున్నాయి. ఈ నెలాఖరులో ధనుష్‌ రాజకీయ ప్రకటన చేయనున్నారనే చర్చలు కూడా సామాజిక మాధ్యమాల్లో వైరల్‌ అవుతున్నాయి. అయితే దీనిపై ధనుష్‌ నుంచి అధికారిక ప్రకటన రావాల్సి ఉంది.