జన నాయగన్‌కు కొత్త సీన్స్ ఊపిరిపోస్తాయా?

దళపతి విజయ్ కథానాయకుడిగా, హెచ్ వినోద్ దర్శకత్వంలో తెరకెక్కిన 'జన నాయగన్' విడుదలకు ముందు భారీ అంచనాలు నెలకొన్నప్పటికీ, బాక్సాఫీస్ వద్ద ఆశించిన స్థాయిలో ప్రభావం చూపలేకపోయిందనే అభిప్రాయాలు వ్యక్తమవుతున్నాయి. పైరసీ ప్రభావం, ఆలస్యంగా విడుదల కావడం వంటి అంశాలు సినిమా వసూళ్లపై ప్రభావం చూపినట్లు సినీ వర్గాలు భావిస్తున్నాయి. దీంతో ప్రేక్షకులను మరోసారి థియేటర్లకు రప్పించేందుకు చిత్రబృందం కొత్త వ్యూహంతో ముందుకు వస్తున్నట్లు సమాచారం.

సినిమా నుంచి తొలగించిన ఆరు సన్నివేశాలను త్వరలోనే మళ్లీ చిత్రంలో జోడించనున్నట్లు వార్తలు వినిపిస్తున్నాయి. ఈ విషయంపై దర్శకుడు హెచ్ వినోద్ కూడా సంకేతాలు ఇచ్చినట్లు ప్రచారం సాగుతోంది. అయితే ఆ సన్నివేశాలు ఎప్పుడు జోడిస్తారు, వాటి నిడివి ఎంత అనే అంశాలపై ఇంకా అధికారిక స్పష్టత లేదు. అనిరుద్ సంగీతం అందించిన ఈ చిత్రాన్ని కేవీఎన్ ప్రొడక్షన్స్ నిర్మించింది. కొత్తగా చేర్చనున్న సన్నివేశాలు ప్రేక్షకులను మళ్లీ థియేటర్లకు రప్పించి సినిమాకు కొత్త ఊపు తీసుకువస్తాయా అన్నది ఆసక్తికరంగా మారింది.