2027లో ప్రభాస్ నుంచి ట్రిపుల్ ట్రీట్.. మూడు సినిమాల విడుదలకు ప్లాన్!

ఏడాదికి రెండు సినిమాలు విడుదల చేస్తానని గతంలో అభిమానులకు మాటిచ్చిన ప్రభాస్, ఆ హామీని గత కొంతకాలంగా నిలబెట్టుకోలేకపోయారు. గతేడాది ఆయన నుంచి ఒక్క సినిమా కూడా విడుదల కాలేదు. ఈ ఏడాది రెండు సినిమాలు వస్తాయని అభిమానులు ఆశించినా, ‘రాజా సాబ్’తోనే సరిపెట్టుకోవాల్సి వచ్చింది. అయితే 2027లో మాత్రం ప్రభాస్ నుంచి మూడు సినిమాలు వచ్చే అవకాశం ఉందని సినీ వర్గాల్లో చర్చ జరుగుతోంది. హను రాఘవపూడి దర్శకత్వంలో తెరకెక్కుతున్న ‘ఫౌజీ’ తొలుత ఈ ఏడాది డిసెంబర్‌లో విడుదల కావాల్సి ఉండగా, వాయిదా పడి 2027 మార్చి 19న ప్రేక్షకుల ముందుకు రానున్నట్లు సమాచారం.

మరోవైపు సందీప్ రెడ్డి వంగా దర్శకత్వంలో రూపొందుతున్న ‘స్పిరిట్’ను 2027 దీపావళికి విడుదల చేయాలని మేకర్స్ భావిస్తున్నట్లు తెలుస్తోంది. ఎస్ఎస్ రాజమౌళి సృష్టించిన బాహుబలి ప్రపంచం ఆధారంగా రూపొందుతున్న యానిమేషన్ చిత్రం ‘బాహుబలి: ది ఎటర్నల్ వార్ – పార్ట్ 1’ కూడా వచ్చే ఏడాది విడుదలకు ప్లాన్ చేస్తున్నట్లు సమాచారం. ప్రస్తుతం ప్రభాస్ ‘కల్కి 2’లో నటిస్తున్నారు. ‘సలార్ 2’ షూటింగ్ వచ్చే ఏడాది జూన్ నుంచి ప్రారంభమయ్యే అవకాశం ఉందని దర్శకుడు ప్రశాంత్ నీల్ ఇటీవల వెల్లడించారు. అయితే 2027లో మూడు సినిమాల విడుదలపై చిత్ర బృందాల నుంచి అధికారిక ప్రకటనలు రావాల్సి ఉంది.