సెన్సెక్స్‌ పరుగులతో స్టాక్ మార్కెట్‌లో సందడి

దేశీయ స్టాక్ మార్కెట్లు సోమవారం భారీ లాభాలతో ముగిశాయి. అంతర్జాతీయ మార్కెట్‌లో ముడి చమురు ధరలు తగ్గడం, రిలయన్స్ ఇండస్ట్రీస్ మెరుగైన రెండో త్రైమాసిక ఫలితాలు ప్రకటించడం మదుపర్ల సెంటిమెంట్‌ను బలపరిచాయి. దీంతో ప్రధాన సూచీలు 1.3 శాతానికి పైగా లాభపడ్డాయి. సెన్సెక్స్‌ 1,200 పాయింట్లకు పైగా ఎగబాకగా, నిఫ్టీ 23,400 మార్కును దాటింది. బీఎస్‌ఈలో నమోదైన కంపెనీల మొత్తం మార్కెట్ విలువ ఒక్కరోజులోనే రూ.7 లక్షల కోట్లకు పైగా పెరిగింది. దీంతో మదుపర్ల సంపద గణనీయంగా వృద్ధి చెందింది.

సెన్సెక్స్‌ క్రితం ముగింపు 74,459.53 పాయింట్లతో పోలిస్తే 75,178.24 పాయింట్ల వద్ద భారీ లాభాలతో ప్రారంభమైంది. రోజంతా అదే జోరును కొనసాగించిన సూచీ చివరకు 1,233.25 పాయింట్లు పెరిగి 75,692.78 వద్ద ముగిసింది. నిఫ్టీ 387.70 పాయింట్లు లాభపడి 23,440.80 వద్ద స్థిరపడింది. సెన్సెక్స్‌ 30లో రిలయన్స్ ఇండస్ట్రీస్, టాటా స్టీల్, అల్ట్రాటెక్ సిమెంట్, ఎస్‌బీఐ, ఎన్‌టీపీసీ, మారుతీ షేర్లు ప్రధానంగా లాభపడ్డాయి. మరోవైపు ఇన్ఫోసిస్, కోటక్ మహీంద్రా బ్యాంక్, ఐసీఐసీఐ బ్యాంక్, సన్‌ఫార్మా, యాక్సిస్ బ్యాంక్, టెక్ మహీంద్రా, టీసీఎస్ షేర్లు నష్టాలతో ముగిశాయి. డాలర్‌తో పోలిస్తే రూపాయి మారకం విలువ రూ.94.90గా నమోదైంది.

మార్కెట్‌ ర్యాలీకి పలు అంశాలు దోహదపడ్డాయి. రిలయన్స్ ఇండస్ట్రీస్ రెండో త్రైమాసిక ఫలితాలు మెరుగ్గా ఉండటంతో ఆ కంపెనీ షేర్లు దాదాపు 7 శాతం లాభపడ్డాయి. ఇరాన్‌ యుద్ధాన్ని ముగించేందుకు చర్చలు జరుగుతున్నాయన్న వార్తలతో ముడి చమురు ధరలపై ఆందోళనలు తగ్గాయి. శుక్రవారం ట్రేడింగ్‌లో విదేశీ సంస్థాగత మదుపర్లు రూ.3,598.54 కోట్ల విలువైన ఈక్విటీలను కొనుగోలు చేయడం కూడా మార్కెట్‌కు మద్దతుగా నిలిచింది. దక్షిణ కొరియా, జపాన్‌, షాంఘై, హాంకాంగ్‌ మార్కెట్లలో సానుకూల ధోరణులు దేశీయ సూచీలకు కలిసొచ్చాయి. అంతర్జాతీయ మార్కెట్‌లో బ్రెంట్ క్రూడ్ బ్యారెల్ ధర 101.82 డాలర్ల వద్ద, బంగారం ఔన్స్ ధర 3,897 డాలర్ల వద్ద ట్రేడయ్యాయి.