మటన్‌, చికెన్‌, చేపలు.. వయసు పెరిగాక ఏవి తినాలి? వైద్యుల సూచనలు

వయసు పెరుగుతున్న కొద్దీ ఆహారపు అలవాట్లలో మార్పులు చేసుకోవాలని ఆరోగ్య నిపుణులు సూచిస్తుంటారు. ముఖ్యంగా 40, 50 ఏళ్లు దాటిన తర్వాత మాంసాహారం తగ్గించాలని, పూర్తిగా మానేయాలని చాలామంది భావిస్తారు. అయితే వయసు పెరిగిందని మటన్‌, చికెన్‌, చేపలు వంటి మాంసాహార పదార్థాలను పూర్తిగా మానేయాల్సిన అవసరం లేదని నిపుణులు చెబుతున్నారు. తీసుకునే మాంసం రకం, పరిమాణం, వంట విధానంపైనే ఆరోగ్యంపై దాని ప్రభావం ఆధారపడి ఉంటుంది. మటన్‌, బీఫ్‌ వంటి ఎర్ర మాంసాన్ని తరచుగా అధికంగా తీసుకోవడం, సాసేజ్‌లు, బేకన్‌ వంటి ప్రాసెస్‌ చేసిన మాంసాహార పదార్థాలను తినడం వల్ల గుండె జబ్బులు, అధిక కొలెస్ట్రాల్‌, పెద్దపేగు క్యాన్సర్‌ ముప్పు పెరిగే అవకాశం ఉందని పరిశోధనలు సూచిస్తున్నాయి. కొందరిలో అధిక మాంసాహారం యూరిక్‌ యాసిడ్‌ సమస్యలను కూడా తీవ్రతరం చేయవచ్చు. అందువల్ల ఎర్ర మాంసం, ప్రాసెస్‌ చేసిన మాంసం వినియోగాన్ని పరిమితం చేయడం మంచిది.

మాంసాహారాన్ని తగ్గించే లేదా పూర్తిగా మానేసే వారు ప్రోటీన్‌, విటమిన్‌ బి12, ఐరన్‌ వంటి పోషకాలు తగినంత అందేలా ఆహార ప్రణాళిక రూపొందించుకోవాలి. పప్పులు, శనగలు, సోయాబీన్స్‌, టోఫు, పాలు, పెరుగు, పనీర్‌ వంటి పదార్థాలు ప్రోటీన్‌ అవసరాలను తీర్చడంలో సహాయపడతాయి. శాకాహారం లేదా వీగన్‌ ఆహారం తీసుకునేవారు విటమిన్‌ బి12 లోపంపై ప్రత్యేక శ్రద్ధ వహించాలి. మాంసాహారం తినేవారు మటన్‌, ప్రాసెస్‌ చేసిన మాంసానికి బదులుగా చేపలు, చర్మం తొలగించిన చికెన్‌ను పరిమిత పరిమాణంలో తీసుకోవచ్చు. ఎక్కువ నూనె, ఉప్పు వాడకుండా ఉడికించడం, కాల్చడం వంటి పద్ధతులకు ప్రాధాన్యం ఇవ్వాలి. మొత్తంగా వయసు ఆధారంగా కాకుండా వ్యక్తిగత ఆరోగ్య పరిస్థితి, ఆహార నాణ్యత, తీసుకునే పరిమాణాన్ని బట్టి ఆహారపు అలవాట్లను నిర్ణయించుకోవాలి. గుండె జబ్బులు, అధిక కొలెస్ట్రాల్‌, యూరిక్‌ యాసిడ్‌ సమస్యలు ఉన్నవారు వైద్యులు లేదా పోషకాహార నిపుణుల సలహా తీసుకోవడం మంచిది.