కులశేఖరన్‌పట్టినం నుంచి తొలి రాకెట్‌ ప్రయోగం.. ఇస్రో కీలక ప్రకటన

తమిళనాడులోని కులశేఖరన్‌పట్టినం అంతరిక్ష కేంద్రం నుంచి 2027లో తొలి రాకెట్‌ ప్రయోగం చేపట్టనున్నట్లు ఇస్రో ఛైర్మన్‌ నారాయణన్‌ వెల్లడించారు. ఆదివారం చెన్నై విమానాశ్రయంలో మీడియాతో మాట్లాడిన ఆయన.. ఇటీవల ప్రయోగించిన ఎన్‌వీఎస్‌-03 ఉపగ్రహాన్ని జియోసింక్రనస్‌ ట్రాన్స్‌ఫర్‌ ఆర్బిట్‌ (జీటీఓ)లోకి ప్రవేశపెట్టినట్లు తెలిపారు. సుమారు 38 వేల కిలోమీటర్ల ఎత్తులో ఉన్న ఈ ఉపగ్రహం తన సొంత చోదక యంత్రం సాయంతో మరో 5,500 కిలోమీటర్ల ఎత్తుకు చేరుకుందని వివరించారు. 111.75 డిగ్రీల తూర్పు రేఖాంశంలో ఉపగ్రహాన్ని నిర్దేశిత కక్ష్యలో నిలిపేందుకు తదుపరి చర్యలు చేపడుతున్నట్లు చెప్పారు. ప్రజా భద్రత, విమానాల ల్యాండింగ్‌, టేకాఫ్‌, నౌకా రవాణా వంటి రంగాలకు ఈ ఉపగ్రహ సేవలు ఉపయోగపడతాయని పేర్కొన్నారు.

గగన్‌యాన్‌ ప్రాజెక్టులో భాగంగా ఇప్పటివరకు సుమారు 8 వేల ప్రయోగాలు నిర్వహించినట్లు నారాయణన్‌ తెలిపారు. వ్యోమగాములను అంతరిక్షంలోకి పంపే ముందు మానవరహిత అంతరిక్ష నౌకల ప్రయోగాలకు సంబంధించిన ప్రాథమిక పనులు విజయవంతంగా సాగుతున్నాయని చెప్పారు. చంద్రయాన్‌-4, చంద్రయాన్‌-5 ప్రాజెక్టుల పనులను వేగవంతం చేసినట్లు వెల్లడించారు. చంద్రయాన్‌-4 ప్రయోగాన్ని 2028లో చేపట్టనున్నట్లు ప్రకటించారు. అంతరిక్ష పరిశోధనల ద్వారా సేకరించిన 37 టెరాబైట్ల డేటాను ప్రజల పరిశీలన కోసం వెబ్‌సైట్‌లో అందుబాటులో ఉంచినట్లు వివరించారు.