ఎముకల బలం తగ్గకుండ జాగ్రత్తలు తీసుకోవాలంటున్న డాక్టర్లు...

చాలామంది ఫ్రాక్చర్‌ అయిన తర్వాత, వెన్నునొప్పి వేధించినప్పుడు లేదా ఆస్టియోపొరోసిస్‌ నిర్ధారణ అయిన తర్వాతే ఎముకల ఆరోగ్యంపై దృష్టి పెడుతుంటారు. అయితే బలమైన ఎముకలకు పునాది చాలా ముందుగానే పడాలని వైద్య నిపుణులు చెబుతున్నారు. ఎముకలు స్థిరంగా ఉండే కణజాలం కాకుండా నిరంతరం నిర్మాణం, విచ్ఛిన్నం జరిగే జీవ కణజాలం. బాల్యం, యుక్తవయసులో ఎముకల ద్రవ్యరాశి వేగంగా పెరుగుతుంది. సాధారణంగా 20వ దశకంలో గరిష్ఠ స్థాయికి చేరుతుంది. అందుకే 30 ఏళ్ల తర్వాత కొత్తగా ఎముకలను నిర్మించుకోవడం కంటే ఇప్పటికే ఉన్న ఎముకల దృఢత్వాన్ని కాపాడుకోవడంపై ఎక్కువ దృష్టి పెట్టాలి. బెంగళూరులోని ఈవెన్‌ హాస్పిటల్‌కు చెందిన ప్రముఖ ఆర్థోపెడిక్‌ సర్జన్‌ డాక్టర్‌ ప్రశాంత్‌ నాగరాజ్‌ చిన్నప్పటి నుంచే ఆరోగ్యకరమైన అలవాట్లు కొనసాగించాలని సూచించారు. ఎక్కువసేపు కదలకుండా ఉండటం వల్ల కండరాల బలం, శరీర చలనం తగ్గే అవకాశం ఉందని నిపుణులు చెబుతున్నారు.

రోజూ నడక ఆరోగ్యానికి ఉపయోగకరమే అయినప్పటికీ.. ఎముకల బలానికి కేవలం స్టెప్స్‌ పూర్తి చేయడం సరిపోదని నిపుణులు చెబుతున్నారు. వేగంగా నడవడం, మెట్లు ఎక్కడం, డ్యాన్స్‌, జాగింగ్‌ వంటి బరువు మోయించే వ్యాయామాలతో పాటు వెయిట్స్‌, రెసిస్టెన్స్‌ బ్యాండ్స్‌ లేదా శరీర బరువుతో చేసే వ్యాయామాలు ఎముకల దృఢత్వాన్ని కాపాడుకోవడానికి సహాయపడతాయి. కాల్షియం, విటమిన్‌-డి, ప్రొటీన్‌ కూడా కీలకం. పాలు, పెరుగు, పనీర్‌, ఆకుకూరలు, టోఫు వంటి ఆహారాల్లో కాల్షియం లభిస్తుంది. గుడ్లు, కొవ్వు అధికంగా ఉండే చేపలు విటమిన్‌-డికి మంచి వనరులు. ధూమపానం, అధిక మద్యపానం, ఎక్కువసేపు కదలకుండా ఉండటం ఎముకల ఆరోగ్యంపై ప్రతికూల ప్రభావం చూపవచ్చు. ప్రతి ఆరోగ్యవంతమైన 30 ఏళ్ల వ్యక్తికి బోన్‌ డెన్సిటీ పరీక్ష అవసరం లేదని, అయితే గతంలో ఫ్రాక్చర్లు, దీర్ఘకాలిక స్టెరాయిడ్‌ వాడకం, కొన్ని అనారోగ్యాలు లేదా ఇతర ప్రమాద కారకాలు ఉన్నవారికి వైద్యులు పరీక్షలు సూచించవచ్చని నిపుణులు చెబుతున్నారు.