బార్లు, రెస్టారెంట్లకు ఊరట.. కొత్త ప్రత్యేక ఫీజు వసూలుపై హైకోర్టు స్టే

తెలంగాణలోని బార్లు, రెస్టారెంట్ల యజమానులకు హైకోర్టులో ఊరట లభించింది. రాష్ట్ర ప్రభుత్వం కొత్తగా ప్రవేశపెట్టిన ‘స్పెషల్ ప్రివిలేజ్ ఫీజు’ వసూలును నాలుగు వారాల పాటు నిలిపివేస్తూ న్యాయస్థానం మధ్యంతర స్టే విధించింది. అక్టోబర్ 19న ప్రభుత్వం జారీ చేసిన జీవో ద్వారా ఈ కొత్త ఫీజును ప్రవేశపెట్టింది.

ఈ నిర్ణయాన్ని సవాల్ చేస్తూ మొత్తం 114 మంది బార్లు, రెస్టారెంట్ల యజమానులు హైకోర్టును ఆశ్రయించారు. ఎక్సైజ్ చట్టంలో ఇలాంటి ఫీజు వసూలు చేయడానికి ఎలాంటి నిబంధనలు లేవని పిటిషనర్లు తమ వాదనలో పేర్కొన్నారు. ఇరుపక్షాల వాదనలను పరిశీలించిన కోర్టు, ఫీజు వసూలుపై నాలుగు వారాల పాటు మధ్యంతర స్టే విధించి, తదుపరి విచారణను నవంబర్ 27కు వాయిదా వేసింది.