ఉదయాన్నే ఈ ఆరోగ్య చిట్కాలు పాటిస్తున్నారా? ఆఫీసులో ఇబ్బందులు తప్పవు

ఆరోగ్యంగా ఉండాలనే ఉద్దేశంతో చాలామంది ఉదయం నిద్రలేవగానే కలబంద జ్యూస్, గుమ్మడికాయ జ్యూస్, నిమ్మరసం, వెనిగర్ వంటి పానీయాలను తీసుకుంటుంటారు. మరికొందరు రాగి ముద్ద, చిరుధాన్యాలు, అధిక ఫైబర్ ఉన్న ఆహారాన్ని అలవాటు చేసుకుంటారు. అయితే ఆరోగ్యానికి మంచివని చెప్పుకునే ప్రతి ఆహారం, చిట్కా అందరికీ ఒకేలా సరిపోదు. ముఖ్యంగా ఆఫీసుకు వెళ్లే ముందు కొత్త ఆహారపు అలవాట్లు లేదా జీర్ణక్రియను ప్రభావితం చేసే చిట్కాలను ప్రయత్నిస్తే కొందరిలో కడుపు ఉబ్బరం, విరేచనాలు, కడుపునొప్పి, వికారం వంటి సమస్యలు తలెత్తవచ్చు. ఫలితంగా రోజువారీ పనులపై ఏకాగ్రత తగ్గే అవకాశం ఉంటుంది.

కలబందలోని లేటెక్స్ పదార్థం విరేచనాలకు కారణం కావచ్చు. గుమ్మడికాయ చేదుగా ఉంటే అందులోని కుకుర్బిటాసిన్స్ వల్ల వాంతులు, విరేచనాలు వచ్చే ప్రమాదం ఉంది. రాగి, ఓట్స్, చియా సీడ్స్, మొలకలు వంటి ఫైబర్ అధికంగా ఉండే ఆహారాలను ఒక్కసారిగా ఎక్కువగా తీసుకోవడం వల్ల కొందరికి గ్యాస్, కడుపు ఉబ్బరం కలగవచ్చు. అలాగే వైద్యుల సలహా లేకుండా లాక్సేటివ్స్ లేదా పొట్ట శుభ్రం చేసే హెర్బల్ డ్రింక్స్ వాడటం, పరగడుపున నిమ్మరసం లేదా వెనిగర్ తీసుకోవడం కూడా అసౌకర్యాన్ని పెంచవచ్చు. అధికంగా కాఫీ తాగడం, అల్పాహారం మానేయడం, కొత్త డైట్‌ను హఠాత్తుగా ప్రారంభించడం వంటి అలవాట్ల విషయంలోనూ జాగ్రత్త అవసరం. రాత్రి మిగిలిన నాన్‌వెజ్‌ను సరిగ్గా నిల్వ చేయకుండా తినడం వల్ల ఫుడ్ పాయిజనింగ్ ప్రమాదం ఉంటుంది.
గమనిక: ఆహార పదార్థాల ప్రభావం వ్యక్తి శరీరతత్వాన్ని బట్టి మారవచ్చు. తరచూ విరేచనాలు, కడుపునొప్పి లేదా ఇతర జీర్ణ సంబంధిత సమస్యలు ఎదురైతే వైద్యులను సంప్రదించాలి. కలబంద లేటెక్స్, చేదు గుమ్మడికాయ రసం వంటి వాటిని వైద్యుల సలహా లేకుండా ఆరోగ్య చిట్కాలుగా ఉపయోగించకూడదు.