‘రాక్షసుడు’కు 40 ఏళ్లు.. కేవలం 5 నిమిషాల్లో ‘అచ్చా అచ్చా వచ్చా వచ్చా’ పాట రాసిన వేటూరి

చిరంజీవి కథానాయకుడిగా నటించిన ‘రాక్షసుడు’ సినిమా విడుదలై అక్టోబర్ 2తో 40 ఏళ్లు పూర్తయ్యాయి. ఈ చిత్రంలోని ‘అచ్చా అచ్చా వచ్చా వచ్చా’ పాట ఇప్పటికీ ప్రేక్షకుల మదిలో నిలిచిపోయింది. తెలుగు సినీ సాహిత్యంలో తనదైన శైలిని చూపించిన ప్రముఖ రచయిత వేటూరి సుందర రామ్మూర్తి ఈ పాటతో తన పదప్రయోగ ప్రతిభను మరోసారి చాటుకున్నారు. 1986లో సినిమా చిత్రీకరణ సమయంలో ఎదురైన ఓ ప్రత్యేక సవాల్‌ను స్వీకరించి.. వేటూరి కేవలం ఐదు నిమిషాల్లో ఈ పాటను రాసినట్లు చెబుతారు.

ఈ పాటకు సంబంధించిన కథనం ప్రకారం.. చిత్రీకరణ సమయంలో ఓ కో-డైరెక్టర్ ‘చ్చా’ శబ్దంతో కూడిన పదాలను పదే పదే ఉపయోగించడం నిర్మాత కె.ఎస్. రామారావు దృష్టిని ఆకర్షించింది. దీంతో ‘చ్చా’ శబ్దం వచ్చేలా పాట రాయాలని వేటూరిని కోరిన ఆయన.. పాటలో వచ్చే ప్రతి ‘చ్చా’కు రూ.1,000 ఇస్తానని చెప్పినట్లు సమాచారం. వేటూరి ‘అచ్చా అచ్చా వచ్చా వచ్చా’ అంటూ పల్లవిని ప్రారంభించి, పదాల గారడీతో పాటను అద్భుతంగా మలిచారు. ఇందులో దాదాపు 50 ‘చ’కారాలు ఉన్నట్లు చెబుతారు. ఇళయరాజా సంగీతం, ఎస్పీ బాలసుబ్రహ్మణ్యం, ఎస్. జానకి గానం ఈ పాటకు మరింత ప్రత్యేకత తీసుకొచ్చాయి. చిరంజీవి, రాధల డ్యాన్స్‌, తెరపై వారి జోడీ పాటకు మరింత ఆదరణ తీసుకొచ్చాయి.