అజిత్‌ రేసింగ్‌ జర్నీపై ‘గ్లాడియేటర్స్‌’.. ట్రైలర్‌ విడుదల

కోలీవుడ్‌ స్టార్‌ అజిత్‌ కుమార్‌ ప్రొఫెషనల్‌ రేసింగ్‌ జర్నీ ఆధారంగా తెరకెక్కిన ‘గ్లాడియేటర్స్‌: ఇన్‌ పర్స్యూట్‌ ఆఫ్‌ ఛాలెంజెస్‌’ డాక్యుమెంటరీ ట్రైలర్‌ విడుదలైంది. ఏఎల్‌ విజయ్‌ దర్శకత్వం వహించిన ఈ చిత్రం అజిత్‌ సినీ ప్రయాణానికి భిన్నంగా.. మోటార్‌ స్పోర్ట్స్‌పై ఆయనకున్న ఆసక్తి, రేసింగ్‌లో ఎదుర్కొన్న సవాళ్లు, ఎండ్యూరెన్స్‌ రేసింగ్‌లో అవసరమైన క్రమశిక్షణ, ఏకాగ్రత వంటి అంశాలను చూపించనుంది. ట్రైలర్‌లో అజిత్‌ రేసింగ్‌ సర్క్యూట్‌లలో పాల్గొన్న దృశ్యాలతో పాటు ఆయన కుటుంబ సభ్యులు, స్నేహితులు, రేసింగ్‌ టీమ్‌ సభ్యుల అనుభవాలు కనిపించాయి.

ఈ ట్రైలర్‌లో అజిత్‌ భార్య, మాజీ నటి షాలిని అరుదుగా తెరపై కనిపించడం ప్రత్యేక ఆకర్షణగా నిలిచింది. అజిత్‌ రేసింగ్‌పై ఆమె అభిప్రాయాలను పంచుకోగా, ఆయన పిల్లలు కూడా డాక్యుమెంటరీలో కనిపించారు. షాలిని అజిత్‌ కుమార్‌కు చెందిన గోల్డెన్‌ ట్రోఫీ ఫిల్మ్‌ ప్రొడక్షన్‌ ఈ చిత్రాన్ని నిర్మిస్తోంది. జి.వి. ప్రకాశ్‌ కుమార్‌ సంగీతం అందిస్తున్నారు. ‘గ్లాడియేటర్స్‌’ అక్టోబర్‌లో థియేటర్లలో విడుదలయ్యే అవకాశం ఉంది.