‘కేసరి 2’ ప్రమోషన్లలో నాకు అన్యాయం జరిగింది- రెజీనా కసాండ్రా

సినిమా పరిశ్రమలో మహిళా నటుల పట్ల వివక్ష చూపుతున్నారనే చర్చ నడుస్తున్న వేళ నటి రెజీనా కసాండ్రా తనకు ఎదురైన అనుభవాన్ని వెల్లడించారు. కరణ్‌ జోహార్‌కు చెందిన ధర్మ ప్రొడక్షన్స్‌ నిర్మించిన ‘కేసరి 2’లో అక్షయ్‌ కుమార్‌ భార్యగా కీలక పాత్ర పోషించినప్పటికీ.. సినిమా ప్రమోషన్లలో తనకు తగిన ప్రాధాన్యత ఇవ్వలేదని ఆరోపించారు. ఇటీవల జాన్వీ కపూర్‌ దక్షిణాది చిత్ర పరిశ్రమలో తన అభిప్రాయాలను వ్యక్తం చేసేందుకు తగిన అవకాశం లభించలేదని ఓ ఇంటర్వ్యూలో చెప్పిన నేపథ్యంలో రెజీనా స్పందించారు. ధర్మ ప్రొడక్షన్స్‌ సినిమాలో తనకు జరిగిన అన్యాయంపై ఎవరు మాట్లాడతారని ప్రశ్నించారు.

‘కేసరి 2’ నుంచి విడుదలైన ఓ పాటలో మొదటి నుంచి చివరి వరకు తానే కనిపించినప్పటికీ.. సోషల్‌ మీడియాలో తనను కనీసం ట్యాగ్‌ కూడా చేయలేదని రెజీనా ఆవేదన వ్యక్తం చేశారు. ఈ విషయంపై ధర్మ ప్రొడక్షన్స్‌ నుంచి ఇప్పటివరకు ఎలాంటి వివరణ రాలేదన్నారు. బాలీవుడ్‌లో దక్షిణాది నటుల పట్ల వివక్ష ఉంటుందని అభిప్రాయపడ్డారు. ఉత్తరాదిలో తనను ప్రధానంగా దక్షిణాది నటిగానే గుర్తిస్తారని, దీనివల్ల తగిన ప్రాధాన్యత దక్కడం లేదని పేర్కొన్నారు. తమిళం కంటే హిందీ బాగా వచ్చినప్పటికీ ప్రాంతీయ గుర్తింపు కారణంగా వివక్ష ఎదురవుతోందన్నారు. పరిశ్రమలో మహిళా నటులు తమ అనుభవాలను ధైర్యంగా బయటపెట్టాలని సూచించిన రెజీనా.. ఈ అంశాన్ని ఉత్తరాది, దక్షిణాది వివాదంగా మార్చవద్దని కోరారు. అలాంటి చర్చలు ప్రాంతీయ విభేదాలను మరింత పెంచుతాయని అభిప్రాయపడ్డారు. జాన్వీ కపూర్‌, రాధికా ఆప్టే తమ అనుభవాలను వెల్లడించడాన్ని తాను అర్థం చేసుకోగలనని చెప్పారు.