బాక్సాఫీస్‌ను షేక్ చేసిన ‘దృశ్యం 3’.. అజయ్ దేవగణ్ కెరీర్‌లోనే బిగ్గెస్ట్ ఓపెనర్

అజయ్ దేవగణ్ ప్రధాన పాత్రలో నటించిన క్రైమ్ థ్రిల్లర్ ‘దృశ్యం: ది కన్‌క్లూజన్’ (దృశ్యం 3) బాక్సాఫీస్‌ వద్ద భారీ ఓపెనింగ్‌ సాధించింది. ‘దృశ్యం’ సిరీస్‌లో చివరి భాగంగా అక్టోబర్‌ 2న ప్రేక్షకుల ముందుకొచ్చిన ఈ చిత్రం తొలిరోజే ప్రపంచవ్యాప్తంగా రూ.95.10 కోట్ల గ్రాస్‌ వసూళ్లు సాధించినట్లు ట్రేడ్‌ వర్గాలు తెలిపాయి. భారత్‌లో రూ.66.75 కోట్ల నెట్‌ వసూళ్లు, రూ.80.10 కోట్ల గ్రాస్‌ రాబట్టగా.. ఓవర్సీస్‌లో సుమారు రూ.15 కోట్ల గ్రాస్‌ కలెక్షన్లు వచ్చినట్లు సమాచారం. దీంతో అజయ్ దేవగణ్‌ కెరీర్‌లోనే ఇది అత్యధిక ఓపెనింగ్‌గా నిలిచింది. గతంలో ‘సింగం ఎగైన్‌’ సాధించిన సుమారు రూ.43.5 కోట్ల తొలి రోజు నెట్‌ వసూళ్లను ‘దృశ్యం 3’ అధిగమించింది.

గత చిత్రాలతో పోలిస్తే ‘దృశ్యం 3’ ఓపెనింగ్‌ భారీ స్థాయిలో నమోదైంది. 2015లో వచ్చిన తొలి ‘దృశ్యం’ రూ.5.85 కోట్లతో ఓపెన్‌ కాగా.. ప్రపంచవ్యాప్తంగా సుమారు రూ.110 కోట్ల గ్రాస్‌ వసూళ్లు సాధించింది. 2022లో విడుదలైన ‘దృశ్యం 2’ తొలి రోజు రూ.15.38 కోట్లు రాబట్టి.. పూర్తి రన్‌లో సుమారు రూ.342 కోట్ల గ్రాస్‌ కలెక్షన్లు సాధించింది. తాజాగా ‘దృశ్యం 3’ తొలి రోజు వసూళ్ల పరంగా బాలీవుడ్‌లో అత్యధిక ఓపెనింగ్స్‌ సాధించిన చిత్రాల జాబితాలో చోటు దక్కించుకున్నట్లు ట్రేడ్‌ వర్గాల గణాంకాలు వెల్లడిస్తున్నాయి. ఈ చిత్రంతో ‘దృశ్యం’ ఫ్రాంచైజీ మరోసారి బాక్సాఫీస్‌ వద్ద తన సత్తా చాటింది.