‘జైలర్ 2’ ప్రమోషన్స్‌లో ఊహించని ట్విస్ట్.. మేకర్స్ ప్లాన్ ఏంటి?

సూపర్ స్టార్ రజినీకాంత్, దర్శకుడు నెల్సన్ దిలీప్‌కుమార్ కాంబినేషన్‌లో తెరకెక్కుతున్న మోస్ట్ అవైటెడ్ సీక్వెల్ ‘జైలర్ 2’. అక్టోబర్ 15న ఈ సినిమా థియేటర్లలో విడుదల కానుంది. రిలీజ్ తేదీ దగ్గరపడుతున్న నేపథ్యంలో మేకర్స్ ప్రమోషన్ కోసం అనుసరిస్తున్న వ్యూహం ప్రస్తుతం ఆసక్తికరంగా మారింది. ‘జైలర్’ తొలి భాగంలో అనిరుధ్ సంగీతంతో వచ్చిన ‘హుకుమ్’ వంటి మాస్ ఆంథమ్‌లు సినిమాపై భారీ హైప్‌ను తీసుకొచ్చాయి.

అయితే ‘జైలర్ 2’ విషయంలో మాత్రం ప్రమోషన్స్‌ను మేకర్స్ భిన్నంగా ప్రారంభించారు. ‘అలా బొలేలో’, ‘వన్ సన్ వన్ మూన్’ వంటి మెలోడీ, సాఫ్ట్ ట్రాక్స్‌ను ముందుగా విడుదల చేస్తున్నారు. రజినీకాంత్ మాస్ ఇమేజ్‌కు తగ్గట్టుగా హై-వోల్టేజ్ పాటను ఆశించిన కొందరు అభిమానులకు ఈ పాటలు ఆశించిన స్థాయిలో కిక్ ఇవ్వలేదనే అభిప్రాయాలు వ్యక్తమవుతున్నాయి. అయితే కీలకమైన మాస్ సాంగ్, ట్రైలర్, ఇతర సర్‌ప్రైజ్‌లను రిలీజ్‌కు ముందు దశలో విడుదల చేయాలనే ఉద్దేశంతోనే ఈ వ్యూహాన్ని అనుసరిస్తున్నారనే ప్రచారం జరుగుతోంది. మరి రాబోయే రోజుల్లో ‘జైలర్ 2’ ప్రమోషన్స్ ఏ స్థాయిలో హైప్ పెంచుతాయో చూడాలి.