ఏడేళ్ల ఫిట్‌నెస్ ప్రయాణం వెనుక అసలు కథ ఇదే..

ప్రముఖ నటి, రాజకీయ నాయకురాలు ఖుష్బూ సుందర్ కుమార్తె ఆనందిత సుందర్ తన బరువు తగ్గడంపై వస్తున్న వివాదాలకు స్పందించారు. తాను సర్జరీలు చేయించుకున్నానని లేదా బరువు తగ్గించే ఇంజెక్షన్లు వాడానని జరుగుతున్న ప్రచారాన్ని ఆమె తీవ్రంగా ఖండించారు. చిన్నప్పటి నుంచి ఊబకాయం సమస్యలను ఎదుర్కొన్న తాను, తన అక్కతో కలిసి ఆరోగ్యకరమైన జీవనశైలిని అలవాటు చేసుకుని ఫిట్‌నెస్‌పై దృష్టి పెట్టామని తెలిపారు. వ్యాయామం, సరైన ఆహార నియమాలతోనే ఈ మార్పు సాధ్యమైందని ఆమె స్పష్టం చేశారు.

ఓ పాడ్‌కాస్ట్‌లో మాట్లాడిన ఆనందిత, తన ఫిట్‌నెస్ ట్రాన్స్‌ఫర్మేషన్‌కు దాదాపు ఏడేళ్ల సమయం పట్టిందని వెల్లడించారు. చిన్న వయసులోనే తీవ్ర స్థాయిలో బాడీ షేమింగ్, సోషల్ మీడియా ట్రోలింగ్‌ను ఎదుర్కొన్నానని ఆమె భావోద్వేగంగా గుర్తుచేసుకున్నారు. ఇతరులను ఆకట్టుకోవడం కోసం కాదు, ఆరోగ్యాన్ని కాపాడుకోవడం కోసమే బరువు తగ్గానని చెప్పారు. ప్రస్తుతం సినీ పరిశ్రమలో తనకంటూ ప్రత్యేక గుర్తింపు సంపాదించుకునేందుకు కృషి చేస్తున్న ఆనందిత, పలు చిత్రాల్లో పోస్ట్ ప్రొడక్షన్, అసిస్టెంట్ డైరెక్షన్, క్రియేటివ్ ప్రొడక్షన్ విభాగాల్లో పనిచేస్తున్నారు.