‘ది రెడ్ బ్యాగ్’ టీజర్ బాగుంది.సినిమా హిట్ అవ్వాలి : ఏపీ మంత్రి టీజీ భరత్

మెమరీ మేకర్స్ బ్యానర్‌పై హరికృష్ణ సోమిశెట్టి నిర్మాణంలో, రవి కుమార్ సీరపు దర్శకత్వంలో రూపొందిన ‘ది రెడ్ బ్యాగ్’ చిత్ర టీజర్‌ను ఏపీ ఇండస్ట్రీస్, కామర్స్, ఫుడ్ ప్రాసెసింగ్ మంత్రి టీజీ భరత్ ఆవిష్కరించారు. కబీర్ సింగ్, ప్రసాద్ బెహరా, రాధ్య, మోనిక, స్నేహా సింగ్, ఆకాంక్ష, ఈషాన్ శంకర్ తదితరులు నటించిన ఈ చిత్రం ఇప్పటికే విడుదలైన ప్రచార కంటెంట్‌తో ప్రేక్షకుల్లో ఆసక్తిని పెంచింది. టీజర్ లాంచ్ కార్యక్రమంలో మంత్రి టీజీ భరత్ చిత్రబృందానికి శుభాకాంక్షలు తెలిపారు.

కర్నూలులో ఎక్కువ భాగం చిత్రీకరణ జరిపినప్పటికీ విదేశాల్లో తెరకెక్కించినట్టుగా విజువల్స్ కనిపిస్తున్నాయని మంత్రి ప్రశంసించారు. ప్రముఖ దర్శకుడు నాగేశ్వర్ రెడ్డి టీజర్‌ను చూసి ఆశ్చర్యపోయానని, ఇది ట్రెండ్ సెట్టర్‌గా నిలిచే అవకాశముందని అన్నారు. దర్శకుడు రవి కుమార్ సీరపు మాట్లాడుతూ, 16 ఏళ్ల నిరీక్షణ తర్వాత ఈ అవకాశం వచ్చిందని, కథే ఈ చిత్రానికి అసలైన హీరో అని పేర్కొన్నారు. సినిమా చూసిన తర్వాత ప్రతి ఒక్కరికీ ‘ది రెడ్ బ్యాగ్’ గుర్తుండిపోతుందని ధీమా వ్యక్తం చేశారు.

నిర్మాత హరికృష్ణ సోమిశెట్టి సినిమా అద్భుతంగా వచ్చిందని, ప్రేక్షకులందరూ ఆదరించాలని కోరారు. రాధ్య, ఆకాంక్ష, మోనిక, ప్రసాద్ బెహరా తదితర నటీనటులు చిత్ర నిర్మాణంలో పడిన కష్టాన్ని గుర్తుచేసుకుంటూ ప్రేక్షకుల మద్దతు కోరారు. కేవలం ఓ బ్యాగ్ చుట్టూ తిరిగే కథ కాకుండా భావోద్వేగాలతో నిండిన విభిన్న కథాంశంతో ఈ చిత్రం ప్రేక్షకులను ఆకట్టుకుంటుందని చిత్రబృందం విశ్వాసం వ్యక్తం చేసింది.