హైందవతో మళ్లీ పుంజుకున్న బెల్లంకొండ సాయి శ్రీనివాస్?

ఒకప్పుడు బెల్లంకొండ సాయి శ్రీనివాస్ సినిమాలకు హిందీ డబ్బింగ్, ఓటీటీ మార్కెట్లలో మంచి డిమాండ్ ఉండేది. ఇతర హక్కుల విక్రయాల ద్వారానే నిర్మాతలకు గణనీయమైన ఆదాయం లభించేది. అయితే ఇటీవల డిజిటల్ మార్కెట్‌లో చోటుచేసుకున్న మార్పులతో సినిమా హక్కుల కొనుగోళ్ల విషయంలో సంస్థలు ఆచితూచి వ్యవహరిస్తున్నాయి. పెద్ద హీరోల చిత్రాలకు సైతం హక్కుల విక్రయం సవాలుగా మారిన నేపథ్యంలో, సాయి శ్రీనివాస్ నటించిన ‘హైందవ’ మాత్రం విడుదలకు ముందే మంచి వ్యాపారాన్ని సాధించినట్లు తెలుస్తోంది.

ప్రముఖ జీ సంస్థ ఈ సినిమా డిజిటల్, ఇతర ప్రసార హక్కులను సుమారు రూ.30 కోట్లకు కొనుగోలు చేసినట్లు సమాచారం. సంగీత హక్కుల విక్రయం ద్వారా మరో రూ.2 కోట్లు వచ్చినట్లు తెలుస్తోంది. దీంతో ఇప్పటివరకు ఈ చిత్రం సుమారు రూ.32 కోట్ల ప్రీ-రిలీజ్ బిజినెస్‌ను పూర్తి చేసుకున్నట్లు సమాచారం. దాదాపు రూ.50 కోట్ల బడ్జెట్‌తో తెరకెక్కిన ఈ సినిమా నిర్మాతలు సేఫ్ జోన్‌లోకి రావాలంటే థియేటర్ల ద్వారా మరో రూ.17 కోట్ల ఆదాయం సాధించాల్సి ఉంటుంది. ఈ నెల 27న విడుదల కానున్న ‘హైందవ’కు అదే రోజున ప్రేక్షకుల ముందుకు రానున్న ‘మైసా’, ‘భోగి’తో పాటు ఇతర చిత్రాల నుంచి పోటీ ఎదురుకానుంది.