ఏడు సినిమాలతో త్వరలో తెరపైకి మోహన్‌లాల్‌

మలయాళ సూపర్‌స్టార్‌ మోహన్‌లాల్‌ వరుస సినిమాలతో ప్రేక్షకులను అలరించేందుకు సిద్ధమవుతున్నారు. తాజాగా తన రాబోయే ప్రాజెక్టులపై ఆసక్తికరమైన విషయాన్ని వెల్లడిస్తూ, ఏకంగా ఏడు చిత్రాల్లో నటిస్తున్నట్లు తెలిపారు. ఉత్కంఠభరితమైన కథలు, విభిన్న ప్రయాణాలు, ప్రతిభావంతులైన దర్శకులతో కలిసి పనిచేస్తున్నానని పేర్కొన్నారు. ఈ ప్రాజెక్టులకు ప్రియదర్శన్‌, దిలీశ్‌ పోతన్‌, సత్యన్‌ అంతికాడ్‌, జీతూ జోసెఫ్‌, విష్ణు మోహన్‌, అనూప్‌ సత్యన్‌, జూడ్‌ ఆంథోనీ జోసెఫ్‌ దర్శకత్వం వహించనున్నారు.

అయితే ఈ ఏడు చిత్రాల్లో ఏ సినిమా ముందుగా సెట్స్‌పైకి వెళ్తుందనే దానిపై ఇంకా స్పష్టత లేదు. ఇప్పటికే ఈ ఏడాది ‘తుడక్కం’, ‘దృశ్యం 3’ చిత్రాలతో ప్రేక్షకులను పలకరించిన మోహన్‌లాల్‌, ఇకపై వరుస ప్రాజెక్టులతో మరింత సందడి చేయనున్నారు. విభిన్న కథాంశాలు, ప్రముఖ దర్శకుల కాంబినేషన్లతో తెరకెక్కనున్న ఈ సినిమాలపై మోహన్‌లాల్‌ అభిమానుల్లో ఆసక్తి పెరుగుతోంది.