నాగార్జున ‘గీతాంజలి’ గ్రాండ్ రీరిలీజ్‌కు సిద్ధం

తెలుగు సినిమా చరిత్రలో ప్రత్యేక స్థానం సంపాదించుకున్న ప్రేమకథా చిత్రం ‘గీతాంజలి’ మరోసారి ప్రేక్షకుల ముందుకు రానుంది. నాగార్జున, గిరిజ జంటగా మణిరత్నం దర్శకత్వంలో తెరకెక్కిన ఈ చిత్రం నవంబర్‌ 13న రీరిలీజ్ కానున్నట్లు అన్నపూర్ణ స్టూడియోస్‌ అధికారికంగా ప్రకటించింది. ‘‘మరోసారి ఆ మేజిక్‌ను చూసేందుకు సిద్ధంగా ఉండండి’’ అంటూ అభిమానుల్లో ఆసక్తిని పెంచింది. నాగార్జున కెరీర్‌లో ఈ సినిమా చిరస్మరణీయ విజయంగా నిలిచింది.

‘గీతాంజలి’లో మరణానికి చేరువలో ఉన్న ఇద్దరు ప్రేమికుల మధ్య సాగే అనుబంధాన్ని మణిరత్నం ఎంతో భావోద్వేగంగా ఆవిష్కరించారు. ఈ చిత్రంతో గిరిజ టాలీవుడ్‌కు పరిచయమయ్యారు. ఇళయరాజా స్వరపరిచిన పాటలు సినిమాకు మరో ప్రత్యేక ఆకర్షణగా నిలిచాయి. ప్రస్తుతం పాత చిత్రాల రీరిలీజ్‌లకు మంచి ఆదరణ లభిస్తున్న నేపథ్యంలో ‘గీతాంజలి’ కోసం సినీ ప్రియులు ఆసక్తిగా ఎదురుచూస్తున్నారు.