ఫహాద్‌తో తన బంధంపై సరదాగా స్పందించిన నజ్రియా

సినీ పరిశ్రమలో అభిమానులు ఎంతో ఇష్టపడే జంటల్లో ఫహాద్ ఫాజిల్, నజ్రియా నజీమ్ ఒకరు. 2014లో వివాహ బంధంతో ఒక్కటైన ఈ జంట తమ వ్యక్తిగత జీవితాన్ని ఎక్కువగా బయటపెట్టేందుకు ఇష్టపడరు. అయితే నజ్రియా అప్పుడప్పుడు భర్తతో కలిసి దిగిన ఫొటోలను సోషల్ మీడియాలో పంచుకుంటూ అభిమానులను అలరిస్తుంటారు. తాజాగా తన కొత్త చిత్రం సీన్ ప్రమోషన్స్‌లో పాల్గొన్న ఆమె, ఫహాద్‌తో తన అనుబంధం గురించి సరదాగా మాట్లాడారు. సూర్య–జ్యోతిక, ఫహాద్–నజ్రియా జంటలు అభిమానులకు ఆదర్శంగా నిలుస్తున్నాయని ఓ ఇంటర్వ్యూలో యాంకర్ పేర్కొనగా, నజ్రియా నవ్వుతూ.. "ఫహాద్, ఇది విన్నావా? మనం గొడవలు లేకుండా కలిసిమెలిసి ఉండాలని వీళ్లు కోరుకుంటున్నారు" అని అన్నారు. దంపతుల మధ్య పరస్పర గౌరవం, ప్రేమతో పాటు తమ తమ వృత్తుల పట్ల అంకితభావం కూడా ఎంతో ముఖ్యమని ఆమె అభిప్రాయపడ్డారు.

ఇటీవల డోంట్ ట్రబుల్ ది ట్రబుల్ కార్యక్రమంలో ఫహాద్ ఫాజిల్ కూడా తన వివాహం గురించి సరదాగా వ్యాఖ్యానించారు. నజ్రియాను ఉద్దేశించి తాను ఓ చిన్నపిల్లను పెళ్లి చేసుకున్నానని, అందుకే తన సహనం గురించి చాలామంది అడుగుతుంటారని నవ్వులు పూయించారు. ఇక సీన్ సినిమా గురించి నజ్రియా మాట్లాడుతూ, 12 ఏళ్ల తర్వాత తమిళ చిత్రంలో నటించే అవకాశం రావడం, అందులోనూ సూర్యతో కలిసి పనిచేయడం తన కల నెరవేరినట్లుగా ఉందని తెలిపారు. గతంలో ఒకట్రెండుసార్లు ఆయనతో నటించే అవకాశాలు చేజారాయని, ఇప్పుడు ఈ సినిమా ద్వారా ఇద్దరూ కలిసి పనిచేయడం సంతోషంగా ఉందని చెప్పారు. జితు మాధవన్ దర్శకత్వంలో తెరకెక్కిన ఈ యాక్షన్ కామెడీలో సూర్య డీఎస్పీగా, నజ్రియా మాయగా, నస్లెన్ ఈశ్వరన్‌గా కనిపించనున్నారు. ఈ చిత్రం నవంబర్ 6, 2026న థియేటర్లలో విడుదల కానుంది.