మరింత బలంగా మారిన ప్రియాంకా చోప్రా గ్లోబల్‌ బ్రాండ్‌!

ప్రియాంకా చోప్రా వరుస అంతర్జాతీయ ప్రాజెక్టులతో తన గ్లోబల్‌ గుర్తింపును మరింత బలోపేతం చేసుకుంటున్నారు. తాజాగా ఆమె ఖాతాలోకి బ్లూఫ్లై చేరింది. హాలీవుడ్‌ నటుడు రస్సెల్‌ క్రోతో కలిసి ఆమె నటించనున్న ఈ శాస్త్రవిజ్ఞాన యాక్షన్‌ థ్రిల్లర్‌కు నిమ్రోడ్‌ అంటాల్‌ దర్శకత్వం వహించనున్నారు. కాంగో నేపథ్యంగా సాగే ఈ కథలో రహస్య మిషన్‌ చుట్టూ కథనం నడుస్తుంది. భావోద్వేగాలతో కూడిన పాత్రతో పాటు యాక్షన్‌ సన్నివేశాల్లోనూ ప్రియాంకా కనిపించనున్నారు.

మరోవైపు భారతీయ సినిమాలపై ఆమె దృష్టి కొనసాగుతోంది. ఎస్‌.ఎస్‌. రాజమౌళి దర్శకత్వంలో మహేష్‌ బాబు హీరోగా రూపొందుతున్న వారణాసిలో మందాకిని పాత్రలో కీలకంగా కనిపించనున్నారు. ప్రపంచవ్యాప్తంగా ప్రయాణించే కథ, భారీ స్థాయి నిర్మాణం, మహేష్‌ బాబు-ప్రియాంకా కలయిక ఈ చిత్రంపై అంచనాలు పెంచుతున్నాయి. సీటాడెల్‌ వంటి అంతర్జాతీయ సిరీస్‌లతో ప్రపంచ ప్రేక్షకులకు చేరువైన ఆమె.. జీలే జరా, క్రిష్‌ 4 వంటి భారతీయ చిత్రాలపై కూడా ఆసక్తి చూపుతున్నారు. దీంతో ప్రియాంకా ప్రయాణం మరింత విస్తరించే అవకాశాలు కనిపిస్తున్నాయి.