‘శాంతి’ వ్యాఖ్యలపై సంజయ్‌ దత్‌ వివరణ

షేఖర్‌ సుమన్‌ నిర్వహిస్తున్న ‘షేఖర్‌ టునైట్‌’ టాక్‌ షోలో చేసిన వ్యాఖ్యలపై సోషల్‌ మీడియాలో విమర్శలు రావడంతో నటుడు సంజయ్‌ దత్‌ వివరణ ఇచ్చారు. గాంధీ జయంతి సందర్భంగా ప్రసారమైన ప్రత్యేక ఎపిసోడ్‌లో తన ‘మున్నాభాయ్‌’ పాత్రను స్ఫూర్తిగా తీసుకుని రూపొందించిన స్క్రిప్టెడ్‌ కార్యక్రమంలో భాగంగా ఆ వ్యాఖ్యలు చేసినట్లు తెలిపారు. ఎవరినీ, ఏ వర్గాన్నీ లేదా సంస్థనూ బాధపెట్టడం, అగౌరవపరచడం తన ఉద్దేశం కాదని స్పష్టం చేశారు.

ఆ తర్వాత విడుదల చేసిన వీడియోలోనూ తన వ్యాఖ్యలు పూర్తిగా స్క్రిప్ట్‌లో భాగమైనవేనని, అవి తన వ్యక్తిగత అభిప్రాయాలు కాదని సంజయ్‌ దత్‌ స్పష్టం చేశారు. ‘మున్నాభాయ్‌’ చిత్రాల్లోని ‘గాంధీగిరి’ తరహా హాస్యం, వ్యంగ్యంతో ప్రేమ, ఆప్యాయత, ఐక్యత, సౌభ్రాతృత్వాన్ని చెప్పాలనే ఉద్దేశంతోనే ఈ సెగ్మెంట్‌ రూపొందించినట్లు తెలిపారు. వ్యాఖ్యలను సందర్భానికి భిన్నంగా అర్థం చేసుకున్నారని పేర్కొన్నారు. షేఖర్‌ సుమన్‌ కూడా సంజయ్‌ దత్‌కు మద్దతుగా మాట్లాడుతూ ఆయనకు భారత్‌, భారతీయులపై ఎంతో గౌరవం ఉందని చెప్పారు.