శ్రీకాంత్ అయ్యంగార్ తృటిలో తప్పిన ప్రమాదం.. ‘కామ్రేడ్ కళ్యాణ్’ మేకింగ్ వీడియో వైరల్

ఇటీవల విడుదలై ప్రేక్షకుల ప్రశంసలు అందుకుంటున్న ‘కామ్రేడ్ కళ్యాణ్’ సినిమా చిత్రీకరణ సమయంలో జరిగిన ప్రమాదకర ఘటనను ప్రముఖ రచయిత, చిత్ర సమర్పకుడు కోన వెంకట్ వెల్లడించారు. 2025 ఫిబ్రవరిలో మంగళూరు అడవుల్లో ఓ యాక్షన్ సన్నివేశాన్ని చిత్రీకరిస్తుండగా నటుడు శ్రీకాంత్ అయ్యంగార్ నిజంగానే కింద పడబోయారని తెలిపారు. ఈ ఘటనకు సంబంధించిన మేకింగ్ వీడియోను ఎక్స్‌ వేదికగా పంచుకుంటూ, నటీనటులు సినిమా కోసం ఎంతో రిస్క్ తీసుకుంటారని, సినిమానే ప్రాణంగా భావించి కష్టపడతారని భావోద్వేగంగా పేర్కొన్నారు.

కష్టపడి రూపొందించిన సినిమాను ప్రేక్షకులు ఆదరించి విజయవంతం చేసినప్పుడు తమకు ఎంతో సంతోషంగా ఉంటుందని కోన వెంకట్ తెలిపారు. ఈ విజయం శ్రీకాంత్‌తో పాటు చిత్రబృందానికి ఆనందాన్ని ఇచ్చిందని పేర్కొన్నారు. జానకీరామ్ మారెళ్ల దర్శకత్వం వహించిన ఈ చిత్రంలో శ్రీవిష్ణు, మహిమా నంబియార్ జంటగా నటించారు. కోన వెంకట్ సమర్పణలో రూపొందిన ఈ సినిమాలో రాధికా శరత్‌కుమార్, షైన్ టామ్ చాకో తదితరులు కీలక పాత్రలు పోషించారు. విజయ్ బుల్గనిన్ సంగీతం అందించిన ఈ చిత్రం అక్టోబర్ 9న థియేటర్లలో విడుదలైంది.