నాని లుక్ వెనుక కథ ఇదే?

జూలై నెలకు స్వాగతం పలుకుతూ న్యాచురల్ స్టార్ నాని సోషల్ మీడియాలో పంచుకున్న తాజా చిత్రాలు అభిమానుల దృష్టిని ఆకర్షిస్తున్నాయి. పొడవాటి జుట్టుతో పూర్తిగా భిన్నమైన స్టైల్‌లో కనిపించిన ఆయన, ఎడమ చేతి మోచేతికి కట్టిన బ్యాండేజ్‌తో అందరినీ ఆశ్చర్యానికి గురిచేశాడు. దీంతో అభిమానులు గాయం ఎలా అయిందనే విషయంపై చర్చించుకుంటుండగా, నాని మాత్రం తనదైన శైలిలో స్పందించాడు. ‘ఘాయల్ హూ… ఇస్లియే ఘాతక్ హూ’ అనే డైలాగ్‌ను క్యాప్షన్‌గా జోడిస్తూ, గాయమైనా వెనక్కి తగ్గే ప్రసక్తే లేదనే సంకేతం ఇచ్చాడు. ప్రస్తుతం యాక్షన్ సన్నివేశాల కోసం సిద్ధమవుతున్నట్లు ఆయన పోస్ట్ స్పష్టం చేసింది. ఈ కొత్త లుక్ కూడా ఆయన తదుపరి చిత్రంలోని పాత్రకు సంబంధించినదేననే అభిప్రాయాలు సోషల్ మీడియాలో వ్యక్తమవుతున్నాయి.

శ్రీకాంత్ ఓదెల దర్శకత్వంలో నాని హీరోగా రూపొందుతున్న ది ప్యారడైజ్ చిత్రాన్ని సుధాకర్ చెరుకూరి నిర్మిస్తున్నారు. ఇప్పటికే విడుదలైన ‘ఆయా షేర్’ పాటకు అన్ని భాషల్లో అద్భుతమైన స్పందన లభించగా, సినిమాపై అంచనాలు మరింత పెరిగాయి. సంగీత దర్శకుడు అనిరుధ్ రవిచందర్ అందిస్తున్న స్వరాలు ఈ ప్రాజెక్ట్‌కు మరో ప్రధాన ఆకర్షణగా నిలుస్తున్నాయి. యాక్షన్, భావోద్వేగాలు, భారీ నిర్మాణ విలువలతో రూపొందుతున్న ఈ సినిమా దేశవ్యాప్తంగా ప్రేక్షకులను ఆకట్టుకునేలా ప్లాన్ చేస్తున్నట్లు సమాచారం. నాని కొత్త ఫోటోలు, ఆయన పెట్టిన క్యాప్షన్ ప్రస్తుతం అభిమానుల్లో మరింత ఆసక్తిని పెంచుతున్నాయి.