నా కొడుకు రాత్రికి రాత్రే స్టార్ కాలేదు.. విమర్శలకు యష్ తల్లి గట్టి కౌంటర్

కన్నడ రాకింగ్ స్టార్ యష్ ప్రస్తుతం వరుస వివాదాలు, విమర్శల కారణంగా వార్తల్లో నిలుస్తున్నారు. ఆయన నటించిన టాక్సిక్ బాక్సాఫీస్ వద్ద ఆశించిన స్థాయిలో విజయం సాధించలేదంటూ కొందరు నెటిజన్లు విమర్శలు చేస్తున్నారు. మరోవైపు నిర్మాత అల్లు అరవింద్ చేసిన వ్యాఖ్యలు కూడా చర్చకు దారితీశాయి. ఈ నేపథ్యంలో యష్ తల్లి పుష్ప అరుణ్‌కుమార్ తన కుమారుడికి మద్దతుగా నిలిచి, ఆయన ఎదుగుదల వెనుక ఉన్న కష్టాన్ని వివరించారు.

యష్ రాత్రికి రాత్రే పాన్ ఇండియా స్టార్‌గా మారలేదని ఆమె అన్నారు. కేజీఎఫ్‌కు ముందే కన్నడ చిత్ర పరిశ్రమలో వరుస విజయాలు అందుకుని తనకంటూ ప్రత్యేకమైన మార్కెట్, గుర్తింపు సంపాదించుకున్నాడని గుర్తుచేశారు. సినీ నేపథ్యం, వారసత్వంగా వచ్చిన భారీ ఆస్తులు లేకుండా ప్రభుత్వ బస్సు డ్రైవర్ కుమారుడిగా పరిశ్రమలోకి అడుగుపెట్టి స్వయంకృషితో ఈ స్థాయికి ఎదిగాడని తెలిపారు. సమాజానికి హాని చేసే వ్యక్తి కానప్పుడు ఆయన ఎదుగుదలను చూసి కొందరు ఎందుకు భయపడుతున్నారో అర్థం కావడం లేదని ప్రశ్నించారు. తన కుమారుడి విజయాన్ని చూసి తల్లిగా ఎంతో గర్విస్తున్నానని ఆమె పేర్కొన్నారు.