ఓటీటీలో ‘గాంధారి’

లేడీ ఓరియెంటెడ్‌ చిత్రాలు, విభిన్నమైన యాక్షన్‌ పాత్రలకు పేరుగాంచిన తాప్సీ పన్ను మరో శక్తివంతమైన పాత్రతో ప్రేక్షకుల ముందుకు రానున్నారు. ఆమె ప్రధాన పాత్రలో నటించిన యాక్షన్‌ థ్రిల్లర్‌ ‘గాంధారి’కి దేవాశిష్‌ మఖిజా దర్శకత్వం వహించారు. కనికా థిల్లాన్‌ తన కథా పిక్చర్స్‌ బ్యానర్‌పై నిర్మించిన ఈ చిత్రంలో తాప్సీ ‘బానీ’ అనే ధైర్యవంతమైన తల్లి పాత్రలో కనిపించనున్నారు. తన బిడ్డను ఎదుర్కొనే ప్రమాదాల నుంచి కాపాడేందుకు ఓ తల్లి చేసే పోరాటం నేపథ్యంలో కథ సాగుతుంది. ఇష్వాక్‌ సింగ్‌, ఛాయా కదమ్‌, స్వస్తిక ముఖర్జీ, మీతా వశిష్ఠ్‌, జతిన్‌ సర్నా కీలక పాత్రల్లో నటించారు.

షూటింగ్‌ పూర్తి చేసుకున్న ఈ చిత్రం నేరుగా ఓటీటీలో విడుదల కానుంది. ప్రముఖ ఓటీటీ వేదిక నెట్‌ఫ్లిక్స్‌ అధికారికంగా ప్రకటించిన ప్రకారం సెప్టెంబర్‌ 3న ప్రపంచవ్యాప్తంగా స్ట్రీమింగ్‌ కానుంది. ‘ఫిర్ ఆయీ హసీన్ దిల్రుబా’ తర్వాత తాప్సీ, కనికా థిల్లాన్‌, నెట్‌ఫ్లిక్స్‌ కాంబినేషన్‌లో వస్తున్న మరో ఆసక్తికరమైన ప్రాజెక్ట్‌ ఇది. పరిస్థితులకు లొంగకుండా తన బిడ్డ కోసం పోరాడే తల్లి కథగా ‘గాంధారి’ని రూపొందించినట్లు కనికా థిల్లాన్‌ తెలిపారు. తాప్సీ ఈ పాత్రలో అద్భుతంగా ఒదిగిపోయారని ఆమె ప్రశంసించారు.