‘జగమే సంగీతం’ ఓటీటీ రిలీజ్ డేట్ ఫిక్స్...

ప్రకాష్ రాజ్, మధుబాల, శ్రీకాంత్ ప్రధాన పాత్రల్లో నటించిన తాజా తెలుగు వెబ్ సిరీస్ ‘జగమే సంగీతం’ ఓటీటీ స్ట్రీమింగ్‌కు సిద్ధమైంది. సూర్య ప్రతాప్ దర్శకత్వం వహించిన ఈ సిరీస్‌ను మెగాస్టార్ చిరంజీవి కుమార్తె సుస్మిత కొణిదెల నిర్మించారు. హిందీలో విజయవంతమైన ‘బందిష్ బాండిట్స్’ సిరీస్ ఆధారంగా తెరకెక్కిన ‘జగమే సంగీతం’ సెప్టెంబర్ 4 నుంచి అమెజాన్ ప్రైమ్ వీడియోలో స్ట్రీమింగ్ కానుంది. ఈ విషయాన్ని మేకర్స్ అధికారికంగా ప్రకటించారు.

కర్ణాటక సంగీతం నేపథ్యంలో సాగే ఈ కథలో తన తాత శాస్త్రి గారి గొప్ప సంగీత వారసత్వానికి వారసుడైన బాలు జీవితాన్ని చూపించనున్నారు. సంప్రదాయాల భారం, దెబ్బతిన్న కుటుంబ బంధాలు, ఎన్నో ఏళ్లుగా దాచిన రహస్యాలు అతని జీవితాన్ని ఎలా ప్రభావితం చేశాయనేది ఆసక్తికరంగా తెరకెక్కించారు. సంగీతం ఈ కుటుంబంలోని ప్రేమ, సంఘర్షణ, ఆరాటం, గర్వం, ఆశ వంటి భావాలను వ్యక్తపరిచే ప్రధాన భాషగా నిలుస్తుంది. విశాల్ చంద్రశేఖర్ ఈ సిరీస్‌కు సంగీతం అందించారు. అక్షయ్ లగుసాని, సుస్మితా శెట్టి, సుమన్, సిజ్జు మీనన్, షఫీ, ఝాన్సీ, రఘు బాబు యెర్రా, రాకెట్ రాఘవ, నాగి జబర్దస్త్, మిర్చి నాకిరణ్, రూప లక్ష్మి తదితరులు కీలక పాత్రల్లో కనిపించనున్నారు.