ఏపీ అభివృద్ధే లక్ష్యం.. కొత్త పార్టీపై విజయసాయిరెడ్డి కీలక ప్రకటన

మాజీ ఎంపీ విజయసాయిరెడ్డి కొత్త రాజకీయ పార్టీ ఏర్పాటుకు సిద్ధమయ్యారు. ఈ నెల 11న పార్టీ పేరును అధికారికంగా ప్రకటించనున్నట్లు వెల్లడించారు. రాష్ట్రంలో మూడో ప్రత్యామ్నాయ రాజకీయ శక్తిగా తమ పార్టీ నిలుస్తుందని ఆయన తెలిపారు. పార్టీని ప్రజాస్వామ్యబద్ధంగా నడిపిస్తామని, తనతో పాటు ఓవీ రమణ కూడా పార్టీని ముందుకు తీసుకెళ్తారని చెప్పారు. ఆంధ్రప్రదేశ్ శ్రేయస్సు, అభివృద్ధే తమ పార్టీ ప్రధాన లక్ష్యమని స్పష్టం చేశారు. తన పార్టీకి బీజేపీతో ఎలాంటి సంబంధం లేదని విజయసాయిరెడ్డి పేర్కొన్నారు.

రాష్ట్ర ఆర్థిక పరిస్థితిపై కూడా ఆయన స్పందించారు. ఆంధ్రప్రదేశ్‌పై రూ.లక్ష కోట్ల అప్పుల భారం ఉండటానికి చంద్రబాబు, వైఎస్ జగన్ పాలనలే కారణమని ఆరోపించారు. రాష్ట్రంలో పుట్టే ప్రతి బిడ్డ అప్పుతోనే పుడుతున్నాడని వ్యాఖ్యానించారు. రాష్ట్రంలో శాంతిభద్రతలు పూర్తిగా క్షీణించాయని, లా అండ్ ఆర్డర్ పరిస్థితి లేదని విమర్శించారు. కొత్త పార్టీ ద్వారా ప్రజలకు మరో రాజకీయ ప్రత్యామ్నాయాన్ని అందించడమే తమ ఉద్దేశమని ఆయన పేర్కొన్నారు.