రాప్తాడు బాధితుడిని పరామర్శించిన వైఎస్ జగన్.. ప్రభుత్వంపై తీవ్ర విమర్శలు

బెంగళూరులోని మణిపాల్ ఆస్పత్రిలో చికిత్స పొందుతున్న రాప్తాడు బాధిత బాలికను వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి పరామర్శించారు. బాలిక ఆరోగ్య పరిస్థితిని వైద్యులను అడిగి తెలుసుకున్నారు. బాధితురాలి తల్లిదండ్రులతో మాట్లాడి ధైర్యం చెప్పారు. బాలిక ఆరోగ్యం మెరుగుపడుతోందని తెలుసుకోవడం సంతోషంగా ఉందని జగన్ పేర్కొన్నారు. ఆమె త్వరగా కోలుకోవాలని ఆకాంక్షించారు. ఈ ఘటనపై స్పందిస్తూ రాష్ట్ర ప్రభుత్వం సిగ్గుతో తలదించుకోవాలని తీవ్రంగా విమర్శించారు.

రాష్ట్రంలో మద్యం, గంజాయి విచ్చలవిడిగా అందుబాటులో ఉండటం, బెల్ట్ షాపుల నిర్వహణే ఇలాంటి ఘటనలకు ప్రధాన కారణమని జగన్ ఆరోపించారు. రెడ్‌బుక్ రాజ్యాంగం కారణంగా రాష్ట్రంలో ఇలాంటి పరిస్థితులు నెలకొన్నాయని విమర్శించారు. బాధిత బాలిక కుటుంబానికి ప్రభుత్వం రూ.50 లక్షల పరిహారం అందించాలని డిమాండ్ చేశారు. బాధిత కుటుంబానికి వైఎస్సార్‌సీపీ అండగా ఉంటుందని భరోసా ఇచ్చారు.