స్థానిక ఎన్నికల్లో హింసపై వైఎస్సార్‌సీపీ నేతల ఆగ్రహం.. చంద్రబాబుపై విమర్శలు

స్థానిక సంస్థల ఎన్నికల సందర్భంగా టీడీపీ నాయకులు, కార్యకర్తలు అరాచకాలకు పాల్పడుతున్నారని వైఎస్సార్‌సీపీ నేత పి.రవీంద్రనాథ్‌రెడ్డి ఆరోపించారు. మహిళలపై దాడులు జరుగుతున్నా పోలీసులు పట్టించుకోవడం లేదని విమర్శించారు. సోమవారం నిర్వహించిన మీడియా సమావేశంలో ఆయన మాట్లాడుతూ.. రాష్ట్రంలో ఎన్నికల పేరుతో ప్రజాస్వామ్యానికి విఘాతం కలిగించే ఘటనలు చోటుచేసుకుంటున్నాయని మండిపడ్డారు. చంద్రబాబు మాటలకు, చేతలకు పొంతన లేదని విమర్శిస్తూ, రాష్ట్రంలోని వ్యవస్థలను ధ్వంసం చేశారని ఆరోపించారు. మీడియాపైనా దాడులు జరిగాయని పేర్కొంటూ, ముఖ్యమంత్రిగా కొనసాగేందుకు చంద్రబాబుకు అర్హత లేదని రవీంద్రనాథ్‌రెడ్డి వ్యాఖ్యానించారు.

మరోవైపు మాజీ డిప్యూటీ సీఎం అంజాద్ బాషా కూడా స్థానిక ఎన్నికల నిర్వహణ తీరుపై అసంతృప్తి వ్యక్తం చేశారు. ఎన్నికల సమయంలో వైఎస్సార్‌సీపీ నేతలు, కార్యకర్తలు ధైర్యంగా నిలబడి పోరాడారని పేర్కొంటూ వారికి ధన్యవాదాలు తెలిపారు. ఎన్నికల్లో హింస చోటుచేసుకున్నప్పటికీ, అవి ప్రశాంతంగా జరిగాయని ఎలా చెబుతారని ప్రశ్నించారు. ఎన్నికల ప్రక్రియలో ఎక్కడైనా ప్రజాస్వామ్యబద్ధమైన వాతావరణం కనిపించిందా అని ఆయన నిలదీశారు. స్థానిక ఎన్నికల్లో చోటుచేసుకున్న ఘటనలపై వైఎస్సార్‌సీపీ నేతలు అధికార పక్షంపై తీవ్ర విమర్శలు గుప్పించారు.