యాపిల్ వాచ్‌కే సవాల్ విసిరిన దీపిందర్ గోయల్

జొమాటో వ్యవస్థాపకుడు, సీఈఓ దీపిందర్ గోయల్ తన కొత్త వేరబుల్ టెక్నాలజీ స్టార్టప్‌ ‘టెంపుల్‌’పై ఆసక్తికరమైన ప్రకటన చేశారు. హార్ట్‌రేట్ ట్రాకింగ్‌లో యాపిల్ వాచ్ సిరీస్ 12 సహా ప్రముఖ ఫిట్‌నెస్ డివైజ్‌ల కంటే తమ ఉత్పత్తి మరింత కచ్చితమైన ఫలితాలు ఇస్తుందని ఆయన పేర్కొన్నారు. ముఖ్యంగా ప్రొఫెషనల్ అథ్లెట్లు, అధిక తీవ్రతతో వ్యాయామాలు చేసే వారి కోసం ఈ డివైజ్‌ను రూపొందించారు. సాధారణంగా మణికట్టు లేదా వేలికి ధరించే ఫిట్‌నెస్ ట్రాకర్లలో తీవ్రమైన వ్యాయామాల సమయంలో హార్ట్‌రేట్ రీడింగ్స్‌లో తప్పులు నమోదవుతుంటాయి. ముఖ్యంగా అథ్లెట్లకు కీలకమైన జోన్ 4, జోన్ 5 వ్యాయామ దశల్లో ఈ సమస్య ఎక్కువగా ఉంటుందని గోయల్ వివరించారు.

తమ వాదనలకు మద్దతుగా యాపిల్ వాచ్ సిరీస్ 12, గార్మిన్ FR970, ఫిట్‌బిట్ ఎయిర్, WHOOP MG, Oura Ring 5 వంటి ఐదు ప్రముఖ డివైజ్‌లను పోలార్ H10 ఛెస్ట్ స్ట్రాప్‌తో పోల్చి పరీక్షించినట్లు టెంపుల్ వెల్లడించింది. స్ప్రింటింగ్ సమయంలో ఛెస్ట్ స్ట్రాప్ కాంటాక్ట్ కోల్పోకుండా దానిని టేప్‌తో బిగించి, ప్రతి సెకనుకు సంబంధించిన డేటాను విశ్లేషించినట్లు తెలిపింది. సంస్థ విడుదల చేసిన అంతర్గత అధ్యయనం ప్రకారం, విశ్రాంతి స్థితి నుంచి గరిష్ఠ శారీరక శ్రమ వరకు టెంపుల్‌లోనే అత్యల్ప తప్పిద శాతం నమోదైంది. జోన్ 4, జోన్ 5 దశల్లో టేప్ చేయని పోలార్ H10 కంటే కూడా మెరుగైన ఫలితాలు ఇచ్చినట్లు కంపెనీ పేర్కొంది. పోటీ డివైజ్‌లలో యాపిల్ వాచ్ సిరీస్ 12 దగ్గరగా నిలవగా, Oura Ring 5లో ఎక్కువ తప్పిదాలు నమోదైనట్లు తెలిపింది. అయితే ఇవి కంపెనీ నిర్వహించిన పరీక్షల ఫలితాలేనని, స్వతంత్రంగా ఇంకా నిర్ధారణ కాలేదని గమనించాలి.

టెంపుల్ కచ్చితత్వానికి రెండు ప్రధాన డిజైన్ అంశాలు కారణమని గోయల్ చెబుతున్నారు. మెడికల్‌ గ్రేడ్‌ అడ్హెసివ్‌ సాయంతో ఈ డివైజ్‌ను చర్మానికి గట్టిగా అతికించుకోవచ్చు. దీంతో కదలికలు, పట్టుతప్పడం వల్ల వచ్చే పొరపాట్లు తగ్గుతాయని కంపెనీ వివరిస్తోంది. అలాగే నుదురు, చెవి మధ్య భాగంలో ఉండే టెంపోరల్ ఆర్టరీపై ఈ పరికరాన్ని ధరించేలా రూపొందించారు. దీని ధర రూ.85,000గా నిర్ణయించారు. 2026 నవంబర్ 1 నుంచి ప్రీ-ఆర్డర్లు ప్రారంభమయ్యాయి. ఆర్డర్ ప్రకారం తయారు చేసే విధానంలో తొలి డివైజ్‌లను మూడు నెలల్లో వినియోగదారులకు అందించాలని లక్ష్యంగా పెట్టుకున్నారు. హార్ట్‌రేట్‌తో పాటు మెదడుకు రక్తప్రసరణను “BrainFlow”, శారీరక ఒత్తిడిని “Entropy” పేర్లతో కొలిచే ఫీచర్లు కూడా ఇందులో ఉన్నాయి. తమ వాదనలను మరింత విస్తృత పరిస్థితుల్లో పరీక్షించేందుకు స్వతంత్ర పరిశోధనా బృందాలకు నిధులు అందించేందుకు కూడా కంపెనీ ముందుకొచ్చింది.