జ్ఞానేశ్‌ కుమార్‌పై కాంగ్రెస్‌ కీలక భేటీ.. నేడు సీడబ్ల్యూసీ సమావేశం

ఢిల్లీలో నేడు కాంగ్రెస్‌ వర్కింగ్‌ కమిటీ సమావేశం జరగనుంది. కాంగ్రెస్‌ అధ్యక్షుడు మల్లికార్జున ఖర్గే అధ్యక్షతన జరిగే ఈ భేటీలో ఎన్నికల సంఘం, ప్రత్యేక ఓటర్ల జాబితా సవరణ (ఎస్‌ఐఆర్‌), ప్రధాన ఎన్నికల కమిషనర్‌ జ్ఞానేశ్‌ కుమార్‌కు సంబంధించిన అంశాలపై చర్చించనున్నట్లు పార్టీ వర్గాలు తెలిపాయి. ఎన్నికల సంఘంలో అంతర్గత విభేదాలపై వచ్చిన నివేదికలు, ఓటర్ల జాబితా ప్రక్రియకు సంబంధించిన అంశాలపై కాంగ్రెస్‌ తన తదుపరి కార్యాచరణను ఖరారు చేయనున్నట్లు సమాచారం.

జ్ఞానేశ్‌ కుమార్‌ను పదవి నుంచి తొలగించేందుకు అనుసరించాల్సిన మార్గంపై కూడా CWCలో చర్చించే అవకాశం ఉంది. కాంగ్రెస్‌ అధ్యక్షుడు ఖర్గే ఇప్పటికే జ్ఞానేశ్‌ కుమార్‌ రాజీనామాను కోరారు. ఈ సమావేశం అనంతరం సెప్టెంబర్‌ 30న విపక్ష ఇండియా కూటమి నేతలు ఢిల్లీలో సమావేశమై ఎన్నికల సంఘానికి సంబంధించిన అంశాలపై ఉమ్మడి కార్యాచరణపై చర్చించనున్నారు. అయితే, అభిశంసన తీర్మానంపై తుది నిర్ణయం ఇంకా తీసుకోలేదని తాజా నివేదికలు సూచిస్తున్నాయి.