అమెరికా మధ్యంతర ఎన్నికల్లో డెమోక్రాట్ల దూకుడు.. కీలక స్థానాల్లో విజయాలు

అమెరికా మధ్యంతర ఎన్నికల్లో డెమోక్రటిక్ పార్టీ కీలక విజయాలతో దూసుకుపోతోంది. సాధారణంగా రిపబ్లికన్లకు బలమైన మద్దతు ఉన్న పలు రాష్ట్రాలు, నియోజకవర్గాల్లోనూ డెమోక్రటిక్ అభ్యర్థులు మెరుగైన ఫలితాలు సాధిస్తున్నారు. నార్త్ కరోలినా సెనేట్ స్థానంలో మాజీ గవర్నర్ రాయ్ కూపర్ రిపబ్లికన్ అభ్యర్థి మైఖేల్ వాట్లీపై ఆధిక్యంలో ఉన్నారు. జార్జియాలో ప్రస్తుత డెమోక్రటిక్ సెనేటర్ జాన్ ఓసాఫ్ తిరిగి విజయం సాధించారు. అలాగే గవర్నర్ ఎన్నికల్లో గెలిచిన కీషా లాన్స్ బాటమ్స్.. జార్జియా తొలి నల్లజాతీయ మహిళా గవర్నర్‌గా చరిత్ర సృష్టించారు. ఫ్లోరిడా రాష్ట్ర ప్రతినిధుల సభలో రిపబ్లికన్లకు ఉన్న మూడింట రెండొంతుల మెజారిటీకి కూడా డెమోక్రాట్లు సవాల్ విసురుతున్నారు.

ఈ ఎన్నికల్లో భారత సంతతికి చెందిన అభ్యర్థులు కూడా విజయాలు, ఆధిక్యాలతో వార్తల్లో నిలుస్తున్నారు. ఫ్లోరిడాలోని 22వ కాంగ్రెస్ నియోజకవర్గం నుంచి డెమోక్రటిక్ అభ్యర్థిగా పోటీ చేసిన పియా దండియా విజయం సాధించారు. 94 శాతం ఓట్ల లెక్కింపు పూర్తయ్యే సమయానికి ఆమెకు 52.2 శాతం ఓట్లు రాగా, రిపబ్లికన్ అభ్యర్థి కేసీ అస్కర్‌కు 47.8 శాతం ఓట్లు వచ్చాయి. కెంటకీలో డెమోక్రటిక్ అభ్యర్థి జాక్ డెంబో అనూహ్య విజయం సాధించారు. మరోవైపు, ఓహియో గవర్నర్ ఎన్నికల్లో రిపబ్లికన్ అభ్యర్థి వివేక్ రామస్వామి ప్రారంభ లెక్కింపులో డెమోక్రటిక్ అభ్యర్థి అమీ యాక్టన్ కంటే వెనుకంజలో ఉన్నారు. న్యూయార్క్ అటార్నీ జనరల్ పదవికి పోటీ చేస్తున్న భారత సంతతి అభ్యర్థి సరితా కొమ్మారెడ్డి, ప్రస్తుత అటార్నీ జనరల్ లెటిషియా జేమ్స్‌తో హోరాహోరీ పోటీలో ఉన్నారు. ఈ స్థానానికి సంబంధించిన తుది ఫలితం ఇంకా వెల్లడికావాల్సి ఉంది.