పెళ్లికి సిద్ధమవుతున్న యువతకు ప్రత్యేక కోర్సు..

వివాహబంధం కలకాలం కొనసాగాలంటే పెళ్లి వేడుకల ఏర్పాట్లతోపాటు భాగస్వామి, కుటుంబ జీవితం, బాధ్యతలపై అవగాహన ఉండాలని భావిస్తోంది గోవాలోని ఓ కళాశాల. పెళ్లికి సిద్ధమవుతున్న యువతీయువకుల కోసం గోవా కాలేజ్ ఆఫ్ హోమ్‌సైన్స్‌ ప్రత్యేక సర్టిఫికెట్‌ కోర్సును ప్రారంభించింది. ‘మ్యారేజ్ రెడీనెస్: ప్రిపేరింగ్ ఫర్ హెల్తీ అండ్ లాస్టింగ్ రిలేషన్‌షిప్స్‌’ పేరుతో నిర్వహించనున్న ఈ కార్యక్రమాన్ని మానవాభివృద్ధి, కుటుంబ అధ్యయనాల విభాగం రూపొందించింది. డిసెంబర్‌ 2 నుంచి 17 వరకు తరగతులు జరగనున్నట్లు కళాశాల ప్రిన్సిపల్‌ మహేశ్‌ పాయ్‌ వెల్లడించారు.

గోవాలో వివాహ సంబంధిత వివాదాలు, విడాకుల కేసులు పెరుగుతున్న నేపథ్యంలో ఈ కోర్సు ప్రాధాన్యం సంతరించుకుంది. విడాకుల కేసులను తగ్గించేందుకు వివాహానికి ముందు కౌన్సెలింగ్‌ అందించే అంశాన్ని పరిశీలిస్తున్నట్లు ముఖ్యమంత్రి ప్రమోద్‌ సావంత్‌ ఇటీవల తెలిపారు. 2022 నుంచి 2025 మధ్య రాష్ట్రంలోని సివిల్‌ కోర్టుల్లో 3,000కుపైగా విడాకులు, వివాహ సంబంధిత కేసులు నమోదయ్యాయి. 2024లోనే 947 కేసులు నమోదైనట్లు ప్రభుత్వ గణాంకాలు వెల్లడిస్తున్నాయి. డేటింగ్‌ ఉద్దేశం, వెడ్డింగ్‌-మ్యారేజ్‌ మధ్య తేడా, వైవాహిక బంధంపై స్త్రీ, పురుష పాత్రల ప్రభావం వంటి అంశాలను ఈ కోర్సులో బోధించనున్నారు. అండర్‌గ్రాడ్యుయేట్‌, పోస్ట్‌గ్రాడ్యుయేట్‌ విద్యార్థులతోపాటు పెళ్లికాని యువత, వివాహానికి సిద్ధమవుతున్నవారు, తమ బంధాన్ని మరింత బలోపేతం చేసుకోవాలనుకునేవారు కూడా ఇందులో చేరవచ్చని కళాశాల తెలిపింది.