చనిపోతేనే బిల్లులు ఇస్తారా? జడ్చర్ల అభివృద్ధి కోసం ఆమరణ నిరాహార దీక్షకు సిద్ధం: ఎమ్మెల్యే అనిరుధ్ రెడ్డి

జడ్చర్ల నియోజకవర్గ అభివృద్ధి పనులకు సంబంధించిన బిల్లుల చెల్లింపులపై ఎమ్మెల్యే అనిరుధ్ రెడ్డి తీవ్ర అసంతృప్తి వ్యక్తం చేశారు. నియోజకవర్గ అభివృద్ధి కోసం 30 వేల మందితో ఆమరణ నిరాహార దీక్ష చేపట్టేందుకు సిద్ధంగా ఉన్నానని ప్రకటించారు. మంత్రుల నియోజకవర్గాలకే బిల్లులు చెల్లిస్తే, మిగతా ఎమ్మెల్యేల పరిస్థితి ఏమిటని ఆయన ప్రశ్నించారు. సోమవారం నిర్వహించిన మీడియా సమావేశంలో మాట్లాడుతూ, అన్ని నియోజకవర్గాలు సమానంగా అభివృద్ధి చెందితేనే ప్రభుత్వం మనుగడ సాగించగలదని వ్యాఖ్యానించారు. అభివృద్ధి పనుల విషయంలో వివక్ష లేకుండా నిధులు కేటాయించాలని, పెండింగ్ బిల్లులను పరిష్కరించాలని ఆయన డిమాండ్ చేశారు.

నాగర్‌కర్నూల్‌లో ఓ కాంట్రాక్టర్ మరణించిన తర్వాత రూ.5 కోట్ల బిల్లు చెల్లించారనే విషయాన్ని ప్రస్తావిస్తూ, జడ్చర్లలో కూడా తాను చనిపోతేనే బిల్లులు ఇస్తారా? అని అనిరుధ్ రెడ్డి ప్రశ్నించారు. నియోజకవర్గ అభివృద్ధి కోసం ఎంతటి త్యాగానికైనా సిద్ధమని, రైతుల ప్రయోజనాల కోసం పోరాటం కొనసాగిస్తానని స్పష్టం చేశారు. రాజకీయ పార్టీలకు అతీతంగా ప్రజాప్రతినిధులంతా ఏకమై జడ్చర్లకు కాలువలు, సాగునీటి సౌకర్యాలు సాధించుకోవాలని పిలుపునిచ్చారు. రైతులకు మేలు జరిగేలా సాగునీటి వసతులను మెరుగుపరచడంతో పాటు, నియోజకవర్గంలో అభివృద్ధి పనులు ముందుకు సాగేందుకు అవసరమైన నిధులు విడుదల చేయాలని ఆయన కోరారు.