సత్యసాయి ఆసుపత్రి సందర్శించిన విజయ్ దేవరకొండ, హరీశ్ రావు

సిద్దిపేట జిల్లా కొండపాక మండలంలోని సత్యసాయి సంజీవని శిశు హృదయాలయ ఆసుపత్రిని మాజీ మంత్రి, బీఆర్ఎస్ నేత తన్నీరు హరీశ్ రావుతో కలిసి నటుడు విజయ్ దేవరకొండ సందర్శించారు. ఇప్పటివరకు 500 మంది చిన్నారులకు ఉచితంగా గుండె ఆపరేషన్లు విజయవంతంగా పూర్తైన సందర్భంగా ఆసుపత్రి నిర్వహించిన ప్రత్యేక కార్యక్రమంలో వారు పాల్గొన్నారు.

ఈ సందర్భంగా చిన్నారులతో సమయం గడిపిన ఇద్దరూ వైద్య బృందం సేవలను ప్రశంసించారు. విజయ్ దేవరకొండ హరీశ్ రావును “సిద్దిపేట్ కా షేర్” అంటూ ప్రశంసించడం ఆకట్టుకుంది. పేద పిల్లల కోసం అందిస్తున్న సేవలు అభినందనీయమని పేర్కొన్నారు. హరీశ్ రావు మాట్లాడుతూ ప్రతి ఒక్కరూ సమాజానికి చేయగలిగినంత సాయం చేయాలని తెలిపారు.