ఉప ఎన్నిక నోటిఫికేషన్ ఆపాలంటూ విజయారెడ్డి పిటిషన్

ఖైరతాబాద్ అసెంబ్లీ ఉప ఎన్నిక నోటిఫికేషన్‌ను నిలిపివేయాలని కోరుతూ కాంగ్రెస్ నేత విజయారెడ్డి తెలంగాణ హైకోర్టును ఆశ్రయించారు. 2024లో తాను దాఖలు చేసిన ఎన్నికల పిటిషన్‌పై తుది తీర్పు వెలువడే వరకు ఉప ఎన్నికల ప్రక్రియను ప్రారంభించవద్దని ఆమె కోరారు. ఈ పిటిషన్‌లో ఎన్నికల సంఘం, దానం నాగేందర్‌ను ప్రతివాదులుగా పేర్కొన్నారు. విజయారెడ్డి పిటిషన్‌పై విచారణను హైకోర్టు మంగళవారానికి వాయిదా వేసింది.

2023 అసెంబ్లీ ఎన్నికల్లో ఖైరతాబాద్ నుంచి దానం నాగేందర్ విజయం సాధించారు. అయితే ఎన్నికల అఫిడవిట్‌లో ఫారం-26 కింద వెల్లడించాల్సిన ఆస్తులు, ఇతర వివరాలను పూర్తిగా పొందుపరచలేదని ఆరోపిస్తూ విజయారెడ్డి 2024లో ఆయన ఎన్నికను సవాల్ చేస్తూ పిటిషన్ దాఖలు చేశారు. ఆ వ్యాజ్యం పెండింగ్‌లో ఉన్న నేపథ్యంలో, దానిపై తీర్పు వెలువడిన తర్వాతే ఖైరతాబాద్ ఉప ఎన్నికకు నోటిఫికేషన్ ఇవ్వాలని ఆమె తాజా పిటిషన్‌లో కోరారు.