బిగ్‌బాస్‌ తెలుగు 10లోకి సీరియల్‌ హీరో ముఖేష్‌ గౌడ?

బుల్లితెర ప్రేక్షకులు ఆసక్తిగా ఎదురుచూస్తున్న బిగ్‌బాస్‌ తెలుగు 10కు సంబంధించిన కంటెస్టెంట్ల గాసిప్స్‌ రోజురోజుకూ పెరుగుతున్నాయి. ఇప్పటికే పలువురు సెలబ్రిటీల పేర్లు ప్రచారంలో ఉండగా.. తాజాగా మరో సీరియల్‌ నటుడి పేరు తెరపైకి వచ్చింది. అతడే ముఖేష్‌ గౌడ. ‘గుప్పెడంత మనసు’ సీరియల్‌లో రిషి పాత్రతో తెలుగు ప్రేక్షకులకు బాగా దగ్గరైన ముఖేష్‌.. గతంలో రెండుసార్లు బిగ్‌బాస్‌ ఆఫర్లు అందుకున్నప్పటికీ వివిధ కారణాలతో వాటిని తిరస్కరించినట్లు సమాచారం. అయితే ఈసారి మాత్రం బిగ్‌బాస్‌ హౌస్‌లోకి అతడి ఎంట్రీ దాదాపు ఖరారైనట్లు టాక్‌ వినిపిస్తోంది.

పేరుకు సీరియల్‌ హీరో అయినప్పటికీ ముఖేష్‌ గౌడకు సినిమా హీరో స్థాయిలో అభిమానుల ఫాలోయింగ్‌ ఉంది. ముఖ్యంగా ‘గుప్పెడంత మనసు’లో అతడి లుక్స్‌, నటన, స్క్రీన్‌ ప్రజెన్స్‌ ప్రేక్షకులను ఆకట్టుకున్నాయి. సోషల్‌ మీడియాలోనూ ముఖేష్‌కు మంచి క్రేజ్‌ ఉంది. ఇన్‌స్టాగ్రామ్‌లో ఆయనకు మూడు లక్షలకు పైగా ఫాలోవర్లు ఉన్నట్లు సమాచారం. ఇదే క్రేజ్‌తో సినిమాల్లోనూ అవకాశాలు అందుకుంటున్న ముఖేష్‌.. బిగ్‌బాస్‌ హౌస్‌లోకి వస్తే తన గేమ్‌తో ఎలాంటి ప్రభావం చూపిస్తారన్నది ఆసక్తికరంగా మారింది. అయితే బిగ్‌బాస్‌ టీమ్‌ అధికారికంగా ప్రకటించే వరకు ఆయన ఎంట్రీపై స్పష్టత రాదు.