అన్న బాటలో తమ్ముడు.. ఆశీర్వాద్ సూర్యవంశీ మెరుపు ఇన్నింగ్స్

భారత యువ క్రికెటర్ వైభవ్ సూర్యవంశీ ఇప్పటికే తన ఆటతో అభిమానులను ఆకట్టుకుంటుండగా, ఇప్పుడు అతని తమ్ముడు ఆశీర్వాద్ సూర్యవంశీ కూడా వార్తల్లో నిలిచాడు. సమస్తిపూర్‌లో జరిగిన ప్రాక్టీస్ మ్యాచ్‌లో ఆశీర్వాద్ అద్భుతమైన బ్యాటింగ్‌తో 119 బంతుల్లో 168 పరుగులు చేసి అందరి దృష్టిని ఆకర్షించాడు. ఈ ఇన్నింగ్స్‌లో అతను 19 ఫోర్లు, 6 సిక్సర్లు బాదాడు.

మొదట బ్యాటింగ్ చేసిన రిషబ్ 11 జట్టు 40 ఓవర్లలో 7 వికెట్లకు 311 పరుగులు చేసింది. ఆశీర్వాద్ 141.18 స్ట్రైక్‌రేట్‌తో ఆడి జట్టుకు భారీ స్కోరు అందించాడు. అతని ప్రదర్శనకు సంబంధించిన ఫొటోలు, వీడియోలు, స్కోర్‌కార్డును అన్నలు ఉజ్జ్వల్ సూర్యవంశీ, వైభవ్ సూర్యవంశీ సామాజిక మాధ్యమాల్లో పంచుకున్నారు.

ఇటీవల మరో ప్రాక్టీస్ మ్యాచ్‌లో కూడా ఆశీర్వాద్ శతకం సాధించాడు. క్రికెట్ అకాడమీ తాజ్‌పూర్ తరఫున ఆడిన అతను 87 బంతుల్లో 20 ఫోర్లు, ఒక సిక్సర్ సహాయంతో 103 పరుగులు చేశాడు. వరుసగా భారీ ఇన్నింగ్స్‌లు ఆడుతున్న ఆశీర్వాద్ సూర్యవంశీపై ఇప్పుడు క్రికెట్ వర్గాల్లో ఆసక్తి పెరుగుతోంది.