వాయు కాలుష్య నియంత్రణకు గుంటూరులో రాష్ట్రంలోనే తొలి ఆల్గే ట్రీ ఏర్పాటు

వాయు కాలుష్యాన్ని తగ్గించే లక్ష్యంతో ఆంధ్రప్రదేశ్‌లోనే తొలిసారిగా గుంటూరులో ఆల్గే ట్రీని ఏర్పాటు చేశారు. నగరంలోని గాంధీ పార్క్‌లో ఏర్పాటు చేసిన ఈ యంత్రం 25 చెట్లకు సమానమైన ఆక్సిజన్‌ను విడుదల చేయగలదని నగర కమిషనర్‌ మయూర్‌ అశోక్‌ తెలిపారు. ఇది సహజమైన చెట్టు కాదని, మైక్రో ఆల్గేతో నింపిన 600 లీటర్ల నీటి ట్యాంక్‌ అని వివరించారు. లలిత ఆసుపత్రి యాజమాన్యం కార్పొరేట్‌ సామాజిక బాధ్యత (CSR) నిధుల కింద రూ.5 లక్షల వ్యయంతో ఈ ఆల్గే ట్రీని ఏర్పాటు చేసినట్లు వెల్లడించారు.

ఈ వ్యవస్థలో అమర్చిన ఫ్యాన్‌లు సౌరశక్తితో పనిచేస్తూ చుట్టుపక్కల గాలిని ట్యాంక్‌లోకి పంపిస్తాయి. గాలిలోని కార్బన్‌డయాక్సైడ్‌ను మైక్రో ఆల్గే శోషించుకుని కిరణజన్య సంయోగక్రియ ద్వారా ఆక్సిజన్‌ను విడుదల చేస్తుంది. పంపులు, సెన్సర్లు, ఎల్‌ఈడీ లైట్ల సాయంతో ఈ ప్రక్రియ వేగంగా జరిగేలా వ్యవస్థను రూపొందించారు. సాధారణ చెట్లతో పోలిస్తే ఇందులో కిరణజన్య సంయోగక్రియ వేగంగా జరుగుతుందని కమిషనర్‌ వివరించారు. నగరాల్లో వాయు కాలుష్యాన్ని నియంత్రించేందుకు సాంకేతిక పరిజ్ఞానాన్ని వినియోగించే ప్రయత్నాల్లో భాగంగా ఈ ఏర్పాటు చేసినట్లు తెలిపారు.