ప్రపంచకప్ టికెట్లకు భారీ డిమాండ్.. భారత్-పాక్ మ్యాచ్‌కు విపరీతమైన క్రేజ్!

ఐసీసీ పురుషుల వన్డే ప్రపంచకప్‌ 2027లో భారత్-పాకిస్థాన్‌ మ్యాచ్‌కు ఇప్పటి నుంచే భారీ క్రేజ్‌ కనిపిస్తోంది. అక్టోబర్‌ 1న టికెట్‌ బ్యాలెట్‌ ప్రారంభమైనప్పటి నుంచి ప్రపంచకప్‌ మ్యాచ్‌ల కోసం పది లక్షలకు పైగా దరఖాస్తులు వచ్చినట్లు సమాచారం. అక్టోబర్‌ 10న జరగనున్న భారత్-పాకిస్థాన్‌ మ్యాచ్‌ కోసమే లక్షకు పైగా అప్లికేషన్లు రావడం విశేషం. టోర్నీకి ఇంకా సమయం ఉన్నప్పటికీ ఈ స్థాయిలో డిమాండ్‌ రావడం అభిమానుల్లో ఉన్న ఆసక్తిని స్పష్టం చేస్తోంది.

భారత్‌ ఆడే ఇతర మ్యాచ్‌లకు కూడా భారీ స్పందన లభిస్తోంది. దక్షిణాఫ్రికా-భారత్‌ మ్యాచ్‌కు 86,000కు పైగా, భారత్‌-ఆస్ట్రేలియా మ్యాచ్‌కు 80,000కు పైగా దరఖాస్తులు వచ్చాయి. మరో భారత్-పాకిస్థాన్‌ మ్యాచ్‌కు దాదాపు 75,000 అప్లికేషన్లు రాగా, జోహన్నెస్‌బర్గ్‌లోని వాండరర్స్‌ మైదానంలో జరిగే ఫైనల్‌ టికెట్ల కోసం దాదాపు 65,000 మంది పోటీ పడుతున్నారు. దక్షిణాఫ్రికా, జింబాబ్వే, నమీబియా సంయుక్తంగా ఆతిథ్యమిస్తున్న ఈ టోర్నీకి అందుబాటు ధరల్లో టికెట్లు, ఫ్యామిలీ బండిల్స్‌, విద్యార్థులు, పెన్షనర్లు, స్థానికుల కోసం ప్రత్యేక రాయితీలను ఏర్పాటు చేశారు.