టీమిండియా ఆటగాళ్లపై సురేశ్ రైనా ప్రశంసలు..

భారత అగ్రశ్రేణి ఆటగాళ్ల విభిన్న బ్యాటింగ్ శైలుల వల్ల ఆధునిక క్రికెట్ మరింత సృజనాత్మకంగా మారిందని టీమిండియా మాజీ బ్యాటర్ సురేశ్ రైనా అభిప్రాయపడ్డాడు. అభిషేక్ శర్మ అద్భుతంగా బ్యాటింగ్ చేస్తున్నాడని, శుభ్‌మన్ గిల్ మంచి ఫామ్‌లో ఉన్నాడని ప్రశంసించాడు. రోహిత్ శర్మ, విరాట్ కోహ్లి వన్డేల్లో తమదైన విభిన్న శైలుల్లో ఆడుతున్నారని పేర్కొన్నాడు. భారత జట్టులో ప్రతిభావంతులైన ఆటగాళ్లతో పాటు పలువురు కోచ్‌లు ఉండటం జట్టుకు కలిసొస్తోందని తెలిపాడు. నిర్భయంగా కొత్త పద్ధతుల్లో ఆడుతూ, ఒత్తిడిని సమర్థంగా ఎదుర్కొనే ఆటగాళ్లు భారత జట్టులో చాలామంది ఉన్నారని రైనా పేర్కొన్నాడు.

చాలా కాలం తర్వాత భారత జట్టులోకి తిరిగి వచ్చిన వెటరన్ పేసర్ భువనేశ్వర్ కుమార్‌ను కూడా సురేశ్ రైనా అభినందించాడు. ఇటీవల భువనేశ్వర్ అద్భుత ప్రదర్శన చేశాడని ప్రశంసించాడు. దేశవాళీ క్రికెట్‌లోనూ అతడు నిరంతరం ఆడుతూ తన ఆటను మెరుగుపరుచుకున్నాడని తెలిపాడు. భువనేశ్వర్‌తో తాను మాట్లాడానని, అతడు క్రమం తప్పకుండా క్రికెట్ ఆడటంతో పాటు ఆట పట్ల ఎంతో అంకితభావంతో ఉంటాడని రైనా వెల్లడించాడు. క్రమశిక్షణ కలిగిన బౌలర్‌గా పేరున్న భువనేశ్వర్ కష్టానికి తగిన ఫలితం దక్కిందని పేర్కొన్నాడు.