వెబ్, మొబైల్‌కు క్లాడ్ కోవర్క్ విస్తరణ..

ఆంత్రోపిక్ తన క్లాడ్ కోవర్క్ (Claude Cowork) సేవను వెబ్ మరియు మొబైల్ ప్లాట్‌ఫారమ్‌లకు విస్తరించింది. దీంతో మ్యాక్స్ ప్లాన్ వినియోగదారులు కంప్యూటర్‌లో ప్రారంభించిన పనులను మొబైల్ ద్వారా పర్యవేక్షించి, తరువాత ఏ పరికరం నుంచైనా పూర్తి చేసిన ఫలితాలను చూడవచ్చు. ఈ ఏడాది జనవరిలో డెస్క్‌టాప్ యాప్‌గా ప్రారంభమైన క్లాడ్ కోవర్క్ సాధారణ కార్యాలయ, వ్యాపార సంబంధిత పనులను స్వయంచాలకంగా నిర్వహించే ఏఐ అసిస్టెంట్‌గా పనిచేస్తుంది. లోకల్ ఫైళ్లు, బ్రౌజర్ యాక్సెస్ అవసరమైన పనుల కోసం డెస్క్‌టాప్ వెర్షన్ కొనసాగుతుందని ఆంత్రోపిక్ తెలిపింది.

రోజువారీ కార్యాలయ పనుల్లో ఏఐ వినియోగాన్ని మరింత విస్తరించడమే ఈ అప్‌డేట్ లక్ష్యమని సంస్థ పేర్కొంది. పలు పరికరాల్లో సమన్వయంతో పని చేయడం, అవసరమైన సమయంలో వినియోగదారుడి సూచనలు కోరడం, బ్యాక్‌గ్రౌండ్‌లో టాస్క్‌లను కొనసాగించడం వంటి ఫీచర్లను క్లాడ్ కోవర్క్ అందిస్తోంది. 6 లక్షలకు పైగా సంస్థల్లో నిర్వహించిన 12 లక్షల సెషన్‌ల విశ్లేషణలో 33.4 శాతం వినియోగం వ్యాపార కార్యకలాపాలకు, 16.4 శాతం కంటెంట్ సృష్టికి, కేవలం 8.7 శాతం మాత్రమే సాఫ్ట్‌వేర్ డెవలప్‌మెంట్‌కు సంబంధించినట్లు ఆంత్రోపిక్ వెల్లడించింది. ఇది కార్యాలయ నిర్వహణలో ఏఐ వినియోగం వేగంగా పెరుగుతున్నట్లు సూచిస్తోంది.